Andarei na presenza do Señor
(Comézase fóra, a poder ser nun lugar un pouco afastado da Igrexa, para poder camiñar procesionalmente unha vez bendicidos os ramos).
CANTO: QUE LEDICIA A MIÑA
SAÚDO:
Quen preside: A paz, o ben e máis a xustiza de quen pasou polo mundo facendo o ben, estean con todas/os vós.
PÓRTICO
Coa celebración de hoxe comezamos, un ano máis, a Semana Santa, os días grandes para @s que nos dicimos seguidores do Deus da vida. Por iso non debe ser o noso un simple asistir, un sentírmonos espectadores dun acontecemento ou mesmo dun teatro; senón que estamos chamad@s a ser actores neste gran acontecemento da historia: Deus é amor, ocúpase e preocúpase por nós. Non quedemos pasmad@s, poñámonos en camiño!.
PROCLAMACION DA PALABRA (ENTRADA DE XESÚS EN XERUSALÉN)
CANTO PROCESIONAL: EU SEI DE QUEN ME FIEI
BENDICIÓN DOS RAMOS
Señor do amor e a misericordia, bendice + estes ramos e palmas, e concédenos a cant@s os levamos a túa capacidade de vivi-la solidariedade e o teu compromiso pola xustiza. Que cant@s agora nos pomos en camiño, lembrando o teu camiño ata Xerusalén, saibamos segui-las túas pegadas de tolerancia, de servizo aos necesitados e de diálogo con todas as persoas que se senten chamadas a facer do mundo un verdadeiro fogar. Por Xesucristo o noso Señor. Amén.
CANTO PROCESIONAL: CAMIÑANDO POLA VIDA
O PERDÓN
Porque non estamos dispost@s a poñernos en camiño cara á Xerusalén do servizo, do compromiso e da entrega, SEÑOR, TEN MISERICORDIA DE NÓS.
Porque en demasiadas ocasións, coma as xentes de Xerusalén, somos inconstantes no teu seguimento, CRISTO, TEN MISERICORDIA DE NÓS.
Porque nas encrucilladas da nosa vida son demasiadas as ocasións nas que nos sentimos perdid@s ou collemos atallos que nos desvían da meta, SEÑOR, TEN MISERICORDIA DE NÓS.
GLORIA
PROCLAMACION DA PAIXÓN SEGUNDO MARCOS
REMUÍÑO
Durante 40 días escoitamos por activa e pasiva a palabra CONVERSIÓN. A Palabra e os signos chamáronnos domingo tras domingo a ir morrendo ao que nos fai infelices, ao que nos fai insolidarios, ao que impide que medremos coma persoas, para irmos construíndo vida, solidariedade, compromiso, igualdade e participación. Agora, neste derradeiro tramo do camiño, invítasenos a mirar cara dentro, a interiorizar, a entrar en Xerusalén, unha Xerusalén que quere ser testemuña do noso cambio, do noso esforzo por deixar atrás eses días nos que parece que todo está negro, que non hai futuro, para abrirnos á esperanza e á ilusión.
Porque o domingo de ramos non quere ser máis que unha invitación a camiñar cara ao triunfo. Un camiño que non vai ser doado, e que nos levará a cansar, a sentir o peso do día nas costas, a ter días nubrados e outros soleados.... pero un camiño que nos conduce cara unha meta: o encontro persoal con Deus. Non vagamos sen rumbo, non andamos descarriad@s, senón que camiñamos cara a plenitude.
Pero este camiño estamos chamad@s a facelo desde a coherencia, desde unhas conviccións que deben ser fortes e fondas. Os xudeus aclaman a Xesús coma Mesías hoxe, e o vindeiro venres pedirán para el a morte. Nós, ás veces, tamén somos viraventos, sóbrannos palabras e fáltanos convición, tamén dicimos que cremos en Xesús, pero a nosa vida cotiá está ben lonxe de ser testemuño daquel que pasou facendo o ben. Que vivamos desde a liberdade unha fe que nos chama á responsabilidade.
ORACIÓN DA COMUNIDADE
Convocad@s para participar da festa da entrada no tempo que nos leva á esperanza e á vitoria, poñémonos nas mans do Señor dicindo xunt@s:
BENDITO SEXAS, XESÚS
Xesús, achégate ao noso mundo, ás nosas vilas e cidades, e sígueo bendicindo coa túa paz
BENDITO SEXAS, XESÚS
Xesús, achégate máis e máis á túa Igrexa, para que con humildade e mansedume te proclame Mesías Salvador
BENDITO SEXAS, XESÚS
Xesús, achégate aos máis pobres e marxinados, para que a travésdo noso testemuño de vida poidan recoñecerte coma o enviado de Deus
BENDITO SEXAS, XESÚS
Xesús, achégate aos nenos e aos mozos, para que te recoñezan e te sigan
BENDITO SEXAS, XESÚS
Xesús, achégate a nós, para que compartamos o camiño comunitario da paixón á resurrección.
BENDITO SEXAS, XESÚS
Bendito sexas, Xesús. Non deixes de bendicirnos coa túa paz e cos teus dons. PXNS. Amén.
Canto do ofertorio: SEGUIREI OS TEUS PASOS
Canto da paz: QUE VEÑA A PAZ
Canto da comuñón: NON VOU SÓ
Para a reflexión
Este é o tempo da historia,
da historia dura e pura;
da paixón de Deus desbordante
e das realidades humanas.
É tempo de morte e vida,
de salvación a mans cheas;
do nós compartido,
do todos ou ninguén,
e do silencio respectuoso e contemplativo.
Tempo de amor e de clamor,
tempo concentrado, non adulterado,
tempo de sorber ata a derradeira gota.
Tempo de nova alianza e
de fidelidade por riba do que sabemos , queremos e podemos.
Tempo no que Deus toma a dianteira
para ofrecernos a vida a mans cheas.
É tempo de todos os que perderon,
dos que sufriron ou malviviron.
É tempo da memoria subversiva,
de Deus facendo xustiza e dándonos vida.
CANTOS
- COMEZO: Que ledicia a miña
- DESPOIS DA LECTURA: Eu sei de quen me fiei
- CANTO PROCESIONAL: Camiñando pola vida
- OFERTORIO: Seguirei os teus pasos
- PAZ: Que veña a paz
- COMUÑÓN: Non vou só
Comentarios