Ir al contenido principal

Xoves Santo

ESQUEMA

1) CANTO DE ENTRADA
2) ESCOITA ACTIVA
3) CORAZÓN MISERICORDIOSO
4) GLORIA
5) ORACIÓN COLECTA
6) PROCLAMACIÓN DA PALABRA
1ª Lectura: Ex 12,1-8.11-14
2ª Lectura: 1 Co 11,23.26.
Evanxeo: Xn 13,1-15

7) PALABRA ENRAIZADA
8) CREDO
9) FRATERNIDADE ORANTE
10) OFERTORIO
11) NOSO PAI
12) PAZ
13) COMUÑÓN
14) A LEDICIA DO DÍA QUE CAE
15) TRASLADO AO MONUMENTO
16) ALTARES: RETÍRANSE OS MANTEIS 
XOVES SANTO: 
PEGADAS DE AMOR NO SERVIZO SOLIDARIO

CANTO GOZOSO

ENTRADA: O amor é o meirande (Nº 119)
GLORIA (Nº 14)
LECTURAS: Douvos un mandato novo (Nº 18)/Xesús é Señor (Nº16)
OFERTORIO: Pan do ceo, pan de vida (Nº 53)
SANTO (Nº 39)
PAZ (Nº 46)
COMUÑÓN: Ti es o Pan do ceo (Nº 54)
ADORACIÓN SANTÍSIMO: Salve, Santo Sacramento (Nº 117)

ESCOITA ACTIVA

Nesta tarde, a mesa, o pan e os xestos de solidariedade son os que nos invitan a participar da celebración. Pan que poñemos sobre o altar como puxo Xesús na Derradeira Cea: tomade e comede, díxolles a eles, e tamén nos di a nós. Pan que nos fai pensar que no mundo segue a haber persoas necesitadas do pan que alimenta os estómagos, pero tamén do pan que alimenta as soidades, as enfermidades ou a tristura.
Facémolo desde o servizo do tempo compartido e da amizade celebrada como comunidade que se reúne no nome de Xesús. Fagamos da celebración mesa de perdón e misericordia, mesa de conversa e de tempo acompañado, mesa de xenerosidade e fraternidade, unidos a todas as persoas necesitadas do pan que pon alegría nos seus ollos e calor nos seus corazóns.


CORAZÓN MISERICORDIOSO

Por non ter sido pan de perdón para os que nolo pediron, SEÑOR, ALÉNTANOS NUN ACTUAR FRATERNO.
Por non ter sido capaces de ofrecer o noso tempo a quen estaba solo e triste, CRISTO, ALÉNTANOS NUN ACTUAR FRATERNO.
Por non saber escoitar a quen nos pedía axuda, SEÑOR, ALÉNTANOS NUN ACTUAR FRATERNO.

GLORIA
(Cantado (Nº 14))

LECTURAS

PROCLAMACIÓN DA PALABRA RECOLLIDA NO LIBRO DO ÉXODO

O Señor díxolles en Exipto a Moisés e a Aharón: 
- "Teredes este mes polo primeiro dos meses, o mes principal de todo o ano. Dicídelle a toda a comunidade de Israel: No día dez deste mes que cada un busque un año por familia e por casa. Se a familia é moi pequena para comer o año enteiro, que se xunte co veciño máis próximo á súa casa, botando conta das persoas. O año será estimado conforme ao que cada un poida comer. O año será sen defecto, macho e dun ano. Pode ser o mesmo un año coma un cabrito. Gardarédelo ata o catorce deste mes e, entre lusco e fusco dese día, inmolarao a comunidade toda de Israel en asemblea. Colleredes o sangue e mollaredes con el as xambas e o lintel das casas nas que se vai comer. Comerdes a carne esa noite, asada no lume, con pan sen levedar e con verduras amargas. 
Comerédelo deste xeito: a cintura cinguida, as sandalias nos pés, o caxato na man. Comerédelo ás presas, pois é a Pascua do Señor. 
Esa noite pasarei eu por todo o Exipto e ferirei de morte todos os primoxénitos, desde os dos homes ata os do gando. Farei cumprida xustiza con todos os deuses de Exipto. Eu, o Señor. O sangue será o sinal das casas onde vós habitades. En vendo o sangue, pasarei sen me deter, e así, cando eu fira a Exipto, non vos tocará a vós a praga exterminadora. 


Este día quedaravos na memoria e faredes nel festa ó Señor. Será festa de precepto por tódalas xeracións. 

PALABRA DO SEÑOR

CANTO: Douvos un mandato novo (nº 18)

PROCLAMACIÓN DA PALABRA RECOLLIDA NA PRIMEIRA CARTA DE SAN PAULO APÓSTOLO AOS CORINTIOS
Irmáns e irmás: 
Eu recibín do Señor, e transmitinvos tamén a vós, que o Señor Xesús, na noite en que o entregaron, colleu pan e, despois de dar grazas, partiuno e dixo: "Isto é o meu corpo, que se entrega por vós; facede isto en lembranza miña". Do mesmo xeito, despois de cear, tomou a copa dicindo: "Esta copa é a Nova Alianza, no meu sangue; cada vez que a bebades, facédeo en lembranza miña". 
Polo tanto, cada vez que comedes este pan e bebedes esta copa, anunciades a morte do Señor, ata que El volte. 

PALABRA DO SEÑOR
CANTO: Xesús é Señor (Nº 16)


PROCLAMACIÓN DA BOA NOVA DO NOSO SEÑOR XESUCRISTO SEGUNDO XOÁN

Antes da festa da Pascua, sabía Xesús que lle chegara a hora de pasar deste mundo para onda o Pai; e xa que amara ós seus que estaban no mundo, amounos ata a fin. 
E mentres ceaban -xa o Satán lle movera o corazón a Xudas, o de Simón Iscariote, para que o entregase-, sabendo que o Pai lle puxera todo nas mans, e que saíra de Deus e ía onda Deus, ergueuse da mesa e deixou a túnica; e collendo unha toalla, cinguiuse con ela. Despois, botou auga nunha palangana e comezou a lavarlles os pés ós discípulos e a secárllelos coa toalla que levaba cinguida. Pero, cando chegou onda Simón Pedro, este díxolle: 
- Señor, ¿vasme lavar os pés ti a min? 
Xesús respondeulle: 
- O que eu fago, ti non o entendes agora; halo comprender despois. 
Pedro replicoulle: 
- Ti non me lavarás os pés a min endexamais. 
Xesús respondeulle: 
- Se non te lavo, non terás parte comigo. 
Exclamou Simón Pedro: 
- Señor, daquela os pés, as mans e maila cabeza. 
Dille Xesús: 
- Quen se bañou, non precisa máis que lavar os pés, pois está todo limpo; e vós estades limpos, aínda que non todos. 
Sabía quen o había de entregar: por iso dixo "non todos estades limpos". 
Despois que Xesús lles lavou os pés e vestiu a súa túnica, sentou outra vez e preguntoulles: 
-¿Comprendedes o que fixen convosco?. Vós chamádesme "Mestre" e "Señor" e dicides ben porque o son. Logo, se eu, o Señor e o Mestre, vos lavei os pés, tamén vós debedes lavarvos os pés uns a outros. Deivos así un exemplo, para que, coma eu fixen convosco, así fagades tamén vós. 

PALABRA DO SEÑOR


PALABRA ENRAIZADA

Xoves santo é xoves de despedida e amor; de promesa e alimento repartido para compartir; de dispoñibilidade para atoparnos e agradecer que Deus quixera quedar entre nós na sinxeleza dun pan amasado en fariña e auga, pero coa fondura do cariño posto a disposición de quen se sente apartado e excluído.
Xoves santo é tamén lembranza fronte a tentación do esquecemento: facede isto en memoria de min. É dicir: non vos esquezades nin lle deades as costas ás persoas que o mundo considera perdedoras e imposibilitadas de facer nada con elas. Dádelles outra, outras, todas as oportunidades. Ninguén sobra. Todos somos importantes, inda que moitas veces non o pareza ou xa teñamos o pensamento feito na negatividade. E sendo todos importantes, ninguén é imprescindible, por iso debemos dar grazas hoxe a Deus porque nos iguala, impedíndonos caer na tentación de crernos mellores ou superiores. O Deus do amor fainos iguais ao situarnos a todos no mesmo nivel: somos irmáns. Xoves Santo é día de relembralo, non esquecelo para poñelo en práctica cada vez que abrimos os ollos a un novo día.
Pero Xoves Santo é tamén misterio que nos reúne ao redor dunha experiencia: Deus queda entre nós para que non vivamos illados, para que non nos sintamos solos, para que descubramos a forza, o sentido e a axuda de ser comunidade. Non camiñamos solos, hai moita xente, dunha punta a outra do mundo, que vive esta mesma experiencia de Deus, que se sente alegre por vivir a mensaxe de Xesús, que se sabe agarimada na tenrura de Deus. Como comunidade rezamos, pedimos e agradecemos xuntos desde o servizo aos demais. O amor que El deixou, é ese mesmo amor que nos invita a poñer en práctica cada día cos demais a través de actitudes de servizo, colaboración e busca de canto fai ás persoas sentirse queridas e acollidas.
Xoves Santo é, entón, momento de saír de nós, erguer a mirada e descubrir que o pouco con Deus é moito, é dicir, na axuda, na preocupación por quen o está a pasar mal, na cercanía cara ao necesitado, no mirar máis alá de nós, estamos descubrindo o rostro de Xesús nos rostros doloridos e excluídos de todas as persoas ás que a sociedade, e nela estamos nós, foi/mos deixando de lado. Cáritas non é unha organización con logotipo de corazóns, senón a Igrexa que se achega aos sobrantes dun mundo que pensa que por ir máis rápido, sen mirar para os lados, é máis feliz e xusto. Pénsao, pero a realidade móstranos que non é así, por iso, seguimos necesitando moitos Xoves Santo que nos axuden a camiñar no realismo, e non no idealismo do que nos gustaría, pero non está sendo. 

FRATERNIDADE ORANTE

Ergamos a vista, fitémola nos rostros que cada día vemos ao noso redor, e fagamos o esforzo de non esquecer a ninguén. Dispostos a camiñar nesta pedagoxía de Deus que non exclúe, senón que busca achegar, dicimos:

QUE A MEMORIA NOS AXUDE A VER A REALIDADE NECESITADA DE AMOR

1. Porque nos chamas a ser unha igrexa misericordiosa, acolledora e solidaria, OREMOS.

QUE A MEMORIA NOS AXUDE A VER A REALIDADE NECESITADA DE AMOR

2. Porque nos vas deixando pegadas que engrandecen o noso corazón e nos dispoñen a saír de nós mesmos para achegarnos aos máis necesitados, OREMOS

QUE A MEMORIA NOS AXUDE A VER A REALIDADE NECESITADA DE AMOR

3. Porque a túa paciencia quere ser para nós actitude que poñamos en práctica cando nos achegamos a escoitar a quen necesita falar; a quen busca un pouco de compañía porque está só; a quen se sente decepcionado polos enganos e mentiras dos que cría a súa axuda, os seus amigos, OREMOS.

QUE A MEMORIA NOS AXUDE A VER A REALIDADE NECESITADA DE AMOR

4. Porque o teu pan quere ser alimento que nos entusiasme e ilusione por compartir unha fe que non se queda no rito, senón que se achega ás persoas, OREMOS.

QUE A MEMORIA NOS AXUDE A VER A REALIDADE NECESITADA DE AMOR

5. Porque nesta tarde nos invitas a rezar polos sacerdotes, para que sexan servidores e non cumpridores de normas nin impoñedores de cargas faltas de misericordia; e polos voluntari@s que traballan na solidariedade gratuíta, ofrecendo o mellor do seu tempo e o sorriso aos esquecidos do noso mundo rico e poderoso, OREMOS.

QUE A MEMORIA NOS AXUDE A VER A REALIDADE NECESITADA DE AMOR

Grazas, Señor, por axudarnos a non perder a memoria, a través da que sempre nos lembras que as persoas están por riba dos resultados, das ganancias e das cousas. P.X.N.S.


OFERTORIO

Achegamos ao altar un bolo de pan e un cacho de uvas, que ao final da celebración poñeremos diante do lugar ao que temos trasladado o Santísimo.




ORACIÓN DIANTE DO SANTÍSIMO

O Señor está entre nós. No rostro dos irmáns magoados pola cobiza, a envexa e as ansias de dominar e mandar duns sobre os outros. El móstrase tamén na sinxeleza de quen sirve, na alegría de quen é visitado, na xustiza de quen é tratado con respecto e recoñecido como persoa; nos sorrisos do neno que pode xogar, aprender e ser querido, sen que teña medo de ser abusado, utilizado ou sometido a engano e explotación. O Señor faise presente na dor das maltratadas e no corazón de quen loita para que non sexan os maltratadores os que triúnfen na loita a favor do respecto, a igualdade e a dignidade compartida.
Grazas, Señor, porque esta tarde, volves deixar en nós pegadas de misericordia que nos axudan a entender que a fe é un compromiso de xustiza e fraternidade no traballo por recoñecerte nos rostros das persoas que sofren no noso mundo. Amén.

Comentarios

Entradas populares de este blog

1 Advento 2024

Carpinteiras do berce da esperanza   CANTOS ·        ENTRADA: Volve, Señor. (Nº 90) ·        LECTURAS: Amostrame, Señor, os camiños da vida (Nº 20) ·        OFERTORIO: Velaquí Señor o viño (Nº 37) ·        COMUÑÓN: Xesús chamado amigo (Nº 89)   SINAL O sinal que utilizaremos neste tempo de Advento vai ser un berce. Berce que iremos conformando ao longo dos catro domingos, para que cando chegue o día de Nadal poidamos poñer sobre el ao Neno recén nacido.   ABRINDO O CORAZÓN             Comezamos hoxe as catro semanas de Advento previas ao tempo de Nadal. Ao longo delas invitarásenos a volver os ollos e o corazón ao Señor, de xeito que cando El chegue nos atope cos brazos abertos e toda a mellor das disposicións para que quede con e entre nós.          ...

Santos 2024

  Tódolos Santos. 2024 Camiñando na comuñón do Pai, do Fillo e do Espírito Santo Cantos Entrada.-  Benaventurados  ( 118) Lecturas.-  O amor é o meirande  ( 119) Ofertorio.-  Quédate, Señor, connosco   ( 63 ) Comuñón.-  Non vou so   ( 60 )   Ollos para ver          As persoas cristiás celebramos hoxe a festa da esperanza. Non é nin a festa dos disfraces nin a festa do medo, é a festa do agradecemento polo testemuño de vida que nos teñen deixado homes e mulleres, os santos da porta do lado, como diría o papa Francisco, que foron quen de construír comunidade en comuñón. Sabendo unir, escoitar, acompañar e mostrar que na vida, o que nos fai verdadeiramente felices é facer o ben, e non rosmar e estar permanentemente facendo crítica e vendo so o negativo das demais persoas.          E hoxe entón a festa da comuñón no Pai, no Fillo e no espírito...

Domingo Ramos 2025

TRANSFORMEMOS A FLOR MURCHA DA CORESMA NO VERDE ESPERANZADO CARA Á PASCUA   Comézase fóra, a poder ser nun lugar un pouco afastado da Igrexa, para poder camiñar procesionalmente unha vez bendicidos os ramos.  COMEZANDO A CAMIÑAR Xesús púxose en camiño cara a Xerusalén ,escoitaremos na lectura do evanxeo de Lucas. Un camiño que se converte en sinal de contradición. En Xerusalén vivirá a morte; pero tamén alí, na mesma Xerusalén, na resurrección, mostrarase a grandeza e a fondura do Deus que envía ao seu Fillo para ser coma nós. A resurrección é, xa que logo, o triunfo, a esperanza, o punto de chegada dun camiño duro, difícil e cheo de dificultades. Nós hoxe tamén, coma Xesús, poñémonos en camiño cara esa Xerusalén que nos levará da mesa da fraternidade ao triunfo da Noite Santa da vida, pasando pola tristura e o desacougo da Paixón do Venres Santo. Dispoñámonos, poñendo o mellor de nós, a comezar esta andaina de salvación e esperanza. ACOLLENDO A BENDICIÓN DE DEUS Señor, sabénd...