Deixémonos seducir pola xustiza, a paz e a igualdade
CANTOS
· Entrada. – CAMIÑANDO POLA VIDA ( 9 )
· Lecturas..- COMO CHE CANTAREI ( 28 )
· Ofertorio. – ACHARTE PRESENTE NA VIDA ( 51 )
· Comuñón.- EU SOÑEI (58 )
OLLOS ABERTOS
Escoitaremos ao profeta Xeremías dicir que Deus seduciuno e el deixouse seducir. A diferencia de outras seducións que buscan enganar, manipular ou mentir, a sedución de Deus é unha sedución para a xustiza, a paz e a igualdade. Porque invita sempre a aquelas persoas que escoitan e acollen a súa palabra a esforzarse en traballar pola xustiza nas súas decisións e maneiras de actuar; chama a facer a paz invitando a buscar camiños de entendemento e acordo no canto da confrontación; urxe a non deixarse engaiolar por quen busca o engano e a mentira como maneira de entender a relación coas demais persoas. Traballemos logo cada unha e cada un de nós para que este proxecto de Deus sexamos quen de ilo realizando na nosa vida de cada día.
CORAZÓN MISERICORDIOSO
· Por tódalas veces nas que non temos prestado atención á voz de Deus que nos chama a ser persoas xustas. SEÑOR, QUE NOS DEIXEMOS SEDUCIR POR TI.
· Por tódalas veces nas que lle demos as costas á invitación que Deus nos fai de ser persoas de paz. CRISTO, QUE NOS DEIXEMOS SEDUCIR POR TI.
· Por tódalas veces nas que convertemos a nosa vida nunha suma de enganos e mentiras que so nós fomos capaces de crer. SEÑOR, QUE NOS DEIXMEOS SEDUCIR POR TI.
PALABRA PROCLAMADA
PROCLAMACIÓN DA PALABRA RECOLLIDA NA PROFECÍA DE XEREMÍAS
Señor, seducíchesme e deixeime seducir;
collíchesme e puideches comigo.
Sirvo a cotío de burla;
a destrución é o meu pan.
Sempre que falo, teño que proclamar: ¡Desastre!;
teño que clamar: ¡Destrución!
A palabra do Señor volveuse para min un escarnio, unha burla continua.
Se digo: "Non me vou acordar máis del,
non falarei máis no seu Nome",
entón a súa palabra vólvese coma un lume abrasador no meu corazón,
un lume prendido nos meus ósos;
fago forza por apagalo, pero non son capaz. Palabra do Señor.
SALMO RESPONSORIAL.- De ti ten sede a miña alma, Señor.
Deus, meu Deus, por ti madrugo,
de ti ten sede a miña alma;
por ti devece o meu corpo,
en terra reseca, sedento e sen auga. De ti ten sede a miña alma, Señor
Miro cara a ti no santuario,
para ve-lo teu poder e a túa gloria.
O teu amor é mellor cá vida,
lóuvante os meus labios. De ti ten sede a miña alma, Señor
5toda a miña vida te bendigo
e levanto no teu nome as miñas mans.
mo de graxa e manteiga, estou satisfeito,
con labios alegres lóuvate a miña boca. De ti ten sede a miña alma, Señor
PROCLAMACIÓN DA PALABRA RECOLLIDA NA CARTA DE SAN PAULO APÓSTOLO ÓS ROMANOS
Rógovos, irmáns, pola misericordia de Deus, que ofrezáde-los vosos corpos coma sacrificio vivo, santo, grato a Deus: coma o voso culto espiritual. E non vos axustedes ó mundo presente. Transformádevos, máis ben, pola renovación da mente, para que poidades coñecer cal é a vontade de Deus: o bo, o que lle agrada, o perfecto. Palabra do Señor.
PROCLAMACIÓN DO SANTO EVANXEO SEGUNDO MATEO
Empezou Xesús a aclararlles ós seus discípulos que tiña que ir a Xerusalén, e que alí o ían facer padecer moito os anciáns, os sumos sacerdotes e os letrados; que o ían executar e que ó terceiro día había resucitar.
Pedro, colléndoo á parte, empezou a rifar con el, dicindo:
‑Deus te libre, Señor; a ti non che pasará nada diso de maneira ningunha.
Pero el, volvéndose, díxolle a Pedro:
‑¡Arreda de min, Satanás! Ti es un tentador para min, porque non te deixas guiar por Deus senón polos homes.
Entón díxolles Xesús ós seus discípulos:
‑Se alguén quere vir comigo, que renuncie a si mesmo, que cargue coa súa cruz e que me siga. Porque quen queira poñer a salvo a súa vida, perderaa; pero quen a perda pola miña causa, poñeraa a salvo. Pois ¿de que lle serve ó home gaña-lo mundo enteiro se perde a súa vida? E ¿que pode dar un home para recobra-la súa vida? Porque o Fillo do Home ha vir coa gloria de seu Pai entre os anxos; entón pagará a cadaquén conforme á súa conducta. Palabra do Señor.
PALABRA REMOÍDA
Tres frases da Palabra de Deus que temos proclamado hoxe poden axudarnos a reflexionar desde ela sobre a nosa vida, para tentar poñer luz e paz nos nosos corazóns, de xeito que no noso camiñar de cada día sintamos esa Palabra como bálsamo que cura as feridas que a vida nos vai deixando. Esas feridas que se nos mostran en formas diversas: dor, enfermidade, tristura, decepción, abuso, manipulación, mentira... e que van deixando un pouso de desconcerto e de desacougo en nós.
Se somos quen de prestar atención á Palabra e conseguimos vencer a tentación de non caer nunha vida de fe consumo e rutina, iremos descubrindo como a fe deixa de ser algo externo a nós para converterse en verdadeiro pulo que alenta e alimenta todo canto facemos, sen necesidade de estar en todo momento co rosario na man ou golpeando o peito para que vexan que somos persoas moi boas e moi relixiosas.
· Señor, seducíchesme e deixeime seducir. Esta invitación esíxenos un atento discernimento para que non confundamos esta sedución potenciadora da dignidade do ser humano, da igualdade e o respecto que as persoas merecen máis alá da súa condición social ou económica. Deixarse acoller pola sedución de Deus é unha invitación a pasar pola vida ao seu estilo: facendo o ben e valorando ás persoas polo que son e non polo que teñen. Sen postureo.
· De ti ten sede a miña alma, Señor. E iso ha ser así porque a nosa alma, a nosa vida, o noso ser, como crentes que somos, ten sede de Deus. Non sede de poder, de recoñecemento social nin de títulos nobiliarios. Nós temos sede de Deus porque precisamos a auga sandadora que nos leva da súa man, que alenta o noso camiñar, que non nos deixa na beira do camiño, senón que nos tende a man e nos vai acompañando.
· Ti es un tentador para min, porque non te deixas guiar por Deus senón polos homes. O que nos evitaría caer nas mans, sempre dispostas a tirar de nós, do cómodo, do que non esixe esforzo, do que nos promete o que el sabe que nunca nos poderá dar. Nunha palabra: afastarnos da tentación do xa e para xa, que tan de moda está hoxe , fará que afrontemos a vida como un reto no que precisamos esforzarnos, clarificarnos e deixar atrás todos eses cantos de serea que poden engaiolar moito os nosos oídos, pero que nunca aqueceran e humanizarán o noso corazón.
ORACIÓN COMPARTIDA
Abertas e abertos á sedución de Deus que nos recoñece iguais e coa mesma dignidade, rezamos dicindo: SEÑOR, SACIA A NOSA SEDE DE DIGNIDADE E IGUALDADE.
· Para que sexamos unha Igrexa, conformada por comunidades, que nos deixemos seducir polo Deus que se mostra sempre nos mais débiles, fráxiles e esquecidos da nosa sociedade. OREMOS. SEÑOR, SACIA A NOSA SEDE DE DIGNIDADE E IGUALDADE.
· Para que no día a día das nosas comunidades parroquiais nos deixemos seducir por todo canto supón esforzo compartido e axuda solidaria, que nos vaia levando a superar tristuras e dificultades. OREMOS. SEÑOR, SACIA A NOSA SEDE DE DIGNIDADE E IGUALDADE.
· Para que no camiñar cotián non endurezamos o corazón a Deus, que sempre nos chama a esforzarnos para ir construíndo un proxecto de vida que nos ilusione e anime a superar a tentación do individualismo. OREMOS. SEÑOR, SACIA A NOSA SEDE DE DIHNIDADE E IGUALDADE.
Señor, que a túa sedución cambie o noso corazón, tantas veces reseco e endurecido, para convertelo en latexo agarimoso e fraterno. Por Cristo o noso Señor. Amén.
RETROUSO AGARIMOSO
Non estamos nada acostumados ao falar de Deus a utilizar esta linguaxe que fala, como escoitabamos na primeira lectura, da sedución de Deus. É a linguaxe do amor, da paixón, do engaiolamento... Deus comportase como un conquistador, como un galán, capaz de usar tódalas súas capacidades namorar a quen el se propón. O dicionario dinos que seducir é: «Persuadir a alguén con loas para algo; cativar o ánimo de alguén».
E o profeta deixouse seducir por ese Deus sedutor. Está a lembrar que este deixarse seducir, guiar, levar pola chamada de Deus foi o seu primeiro amor, cando aínda era mozo. E o seu corazón quedou «apresado», que acompañou ao longo de toda a súa vida. Xa non precisaba máis. Deus saciaba tódalas as súas sedes.
É fermosa e atrevida esta linguaxe, e mesmo nos pode axudar a que reformulemos a nosa experiencia de fe, e a nosa relación con Deus. Unha fe e un Deus que so se poden entender desde o amor.
Comentarios