Ir al contenido principal

4 advento 2020 A

Ledicia e temor non poden ir unidos cando falamos de acoller a Xesús

SINAL DE ADVENTO

Rematamos hoxe de construír o noso sinal de Advento incorporando a cabeza do neno. Deste xeito quédanos configurada a imaxe de quen estamos a esperar ao longo deste Advento: Xesús.

CANTO GOZOSO

  • ENTRADA: Volve Señor (Nº 90)

  • LECTURAS: Cantarei eternamente as misericordias do Señor

  • OFERTORIO: Que ledicia a miña (Nº4)

  • COMUÑÓN: No colo da miña nai (Nº 49)

ESPERTANDO Á RENOVACIÓN

    Xa non falta nada. Estamos mesmo ás portas deste gran acontecemento que queremos vivir e celebrar como remate do tempo de Advento: o Nadal. Ao longo das catro últimas semanas fóisenos invitando, a modo de retrouso, a preparar o camiño, a prepararnos para acoller a quen vén por el. Xa case que está aquí, abrámoslle a porta e deixémolo entrar. 

E como escoitaremos no evanxeo chega da man do si de María, a súa e a nosa nai. Que cando chegue e entre, procuremos que non se senta estraño entre nós.

ABRÍNDONOS Á MISERICORDIA

  • Por ter sido crentes máis de temor que de graza; SEÑOR, QUE ACOLLAMOS A TÚA MISERICORDIA.

  • Porque nos ten faltado ledicia e sobrado tristura; CRISTO, QUE ACOLLAMOS A TÚA MISERICORDIA.

  • Pola nosa teimosía en facer do individualismo eixe do noso actuar; SEÑOR, QUE ACOLLAMOS A TÚA MISERICORDIA.

PALABRA PROCLAMADA

PROCLAMACIÓN DA PALABRA RECOLLIDA NO SEGUNDO LIBRO DE SAMUEL

Instalado o rei David na súa casa, e como o Señor lle dera a paz cos seus inimigos do arredor, díxolle el ao profeta Natán: 

  • "Repara que eu estou instalado nunha casa de cedro, mentres a arca do Señor habita nunha tenda". 

Natán respondeulle ao rei: 

  • "Todo o que tes no corazón, anda e faino, pois o Señor está contigo".

Pero aquela mesma noite veulle a Natán esta palabra do Señor: 

  • "Vai e dille ó meu servo David que isto di o Señor: ¿vasme edificar unha casa para que eu habite nela?. Eu saqueite das mandas, de detrás dos rabaños, para que foses o xefe do meu pobo Israel. Estiven contigo en todo o que emprendiches e arredei os teus inimigos diante de ti. E dareiche un nome tan grande coma o dos grandes da terra. Eu fixarei tamén un posto para o meu pobo Israel. Eu plantareino e el vivirá alí sen sobresaltos. Non volverán asoballalo os fillos da iniquidade, como fixeron á primeira, no tempo en que puxen xuíces sobre o meu pobo Israel. Dareiche o repouso de tódolos inimigos e, por parte, o Señor anúnciache que che dará unha dinastía.

A túa familia e o teu reino permanecerán na miña presencia para sempre, o teu trono manterase firme eternamente".

PALABRA DO SEÑOR

PROCLAMACIÓN DA BOA NOVA DO NOSO SEÑOR XESUCRISTO SEGUNDO LUCAS

Aos seis meses, Deus mandou o anxo Gabriel a unha vila chamada Nazaret, onda unha mociña prometida a un home da casa de David, que se chamaba Xosé; o nome da mociña era María.

Entrando onde estaba ela, díxolle:

-    Alégrate, chea de graza, o Señor está contigo.

Ela turbouse con estas palabras, cavilando no que podería significar o saúdo aquel. O anxo continuou:

-    Non teñas medo, María, porque ti atopaches graza ante Deus;e, fíxate, vas concibir no teu ventre e darás á luz un fillo, ó que lle poñerás de nome Xesús. Será grande e chamarase Fillo do Altísimo, e o Señor Deus daralle o trono de David, seu pai; reinará por sempre na casa de Xacob, e o seu reinado non terá fin.

María respondeulle ó anxo:

-    ¿E como pode ser isto, pois eu son virxe?

O anxo replicoulle:

‑O Espírito Santo baixará sobre ti e o poder do Altísimo cubrirate coa súa sombra; por iso o que vai nacer de ti será santo e chamarase Fillo de Deus. Aí tes a túa curmá Isabel, que concibiu un fillo na súa vellez, e xa está de seis meses a que chamaban estéril, que para Deus non hai imposibles.

María contestou:

-    Velaquí a escrava do Señor: cúmprase en min o que dixeches.

E o anxo marchou de onda ela.

PALABRA DO SEÑOR

NA ESCOITA DA PALABRA

  • David, despois de moitas idas e voltas, atopou a paz. Tamén nós, desde esta palabra escoitada, somos invitad@s a atopar paz, a paz que nos fai aprender a ver a vida como unha experiencia que hai que ir construíndo pouco a pouco e sen présas; a paz que nos invita a non deixar que aniñe en nós, e na mirada que facemos do mundo, o desacougo, o activismo ou a sensación de fracaso e tristura; a paz que nos abre a relacionarnos coas persoas que temos preto buscando facer do diálogo entendemento, e do entendemento esforzo por realizar proxectos en común. Proxectos que busquen achegarnos ás persoas e a situación na que se atopan, esforzándonos por facerlles a vida máis doada e leda. A paz, nunha palabra, que se constrúe e non enfronta nin fai de menos aos demais. E vainos movendo, como moveu a David a saír do permanente mirar só para nós mesmos e aprender/ comezar a mirar aos demais desde unha mirada activa e construtiva. Porque a paz non se espera senón que se desenvolve –vaise facendo- desde o noso facer e buscar canto fai sorrir e move a defender a igualdade da dignidade recibida do amor de Deus.

  • Nesta busca/ construción da paz, como tamén acabamos de escoitar, non imos nin estamos sos. A  presenza, o agarimo, a achega de Deus váisenos descubrindo como unha presenza compartida que vence a tentación de pecharnos en nós mesmos, no noso mundo, e moitas veces na propia irrealidade, para descubrirse en todo canto vai sendo posible grazas ao esforzo compartido, á tarefa realizada comunitariamente, á capacidade de buscar o que nos une e aprendendo a relativizar o que nos separa ou non compartimos. O camiño do Advento é sempre tempo de superación da tentación individualista, que prescinde dos demais e nos vai pechando, inda que digamos o contrario, na soidade entristecida de quen non ten a ninguén. Saiamos logo fortalecidos deste tempo de Advento na conciencia de que só cos e xunto aos demais poderemos preparar oco no corazón para acoller ao neno que xa está a chamar na porta.

  • María, protagonista no evanxeo de hoxe, entendeu ben cal era o proxecto de Deus, e non lle deu as costas, ao contrario: respondeu co seu si. Un si de alegría, de confianza e de servicialidade. Que síntese tan clara, fermosa e sinxela para que tamén a fagamos nosa!

COMPARTINDO O QUE NOS UNE

Porque Ti sempre vés para traernos a paz, queremos dicirche desde o agradecemento: 

QUEREMOS, SEÑOR, SEGUIR AS TÚAS PEGADAS

  • Para que sentíndonos Igrexa traballemos por levar paz e non tensión nin enfrontamento ao mundo do que formamos parte, OREMOS.

  • Para que sempre, pero especialmente neste ano tan difícil para tod@s, non lle deamos as costas ás familias das nosas parroquias que poidan estar ou sentirse soas e pasando por diversas dificultades; OREMOS. 

  • Para que nós non deixemos de aproveitar o camiño do Advento para deixar atrás canto nos fai persoas individualistas e insolidarias; OREMOS. 

Grazas, Señor, por invitarnos a seguir as túas pegadas, evitando perdernos no camiño. P.X.N.S. Amén.

AGRADECENDO O DON DA FE

Di Francisco ao respecto do si de María:

“É unha gran revelación que abre perspectivas inauditas o neno que nacerá desta humilde moza de Nazaret será chamado Fillo do Altísimo: non é posible concibir unha dignidade máis alta ca esta. A resposta de María é unha frase breve, que non fala de gloria ou de privilexio, senón só de dispoñibilidade e de servizo. María non se exalta fronte á perspectiva de converterse na nai do Mesías, senón que permanece modesta e expresa a propia adhesión ao proxecto do Señor.

Este contraste é significativo, porque nos fai entender que María é verdadeiramente humilde e non busca mostrarse. Recoñece ser pequena ante Deus e está contenta de ser así.

Pero tamén é consciente de que a súa resposta depende da realización do proxecto de Deus, e que entón ela está chamada a adherirse en toda si mesma”.

Comentarios

Entradas populares de este blog

Corpus 2024 B

ALÍ ONDE NOS NECESITAS, ABRIMOS CAMIÑOS Á ESPERANZA (CORPUS 2024) CANTO GOZOSO ENTRADA: Pan do ceo, pan da vida (Nº 54) LECTURAS: Ti es o pan do ceo (Nº 33) OFERTORIO: Quédate, Señor, connosco (Nº 63) COMUÑÓN: O amor é o meirande (Nº 120) PARA NON PERDER O PASO Hoxe é día do Corpus Christi, festa grande. Baixo o lema “Alí onde nos necesitas, abrimos camiños á esperanza” celebramos a xornada da caridade, que nos convida a non esquecer que, sempre e en todo lugar, a Igrexa, cada unha das persoas que a formamos, estamos chamadas a ser servidoras e samaritanas, achegándonos para aliviar, acompañar, escoitar e erguer a tanta xente ferida e tirada nas cunetas da vida. O Señor, que hoxe sae ás nosas rúas, volve dicirnos: “Estou aquí, facendo o camiño contigo”. Abramos o noso corazón para escoitar a súa voz que, dun xeito alto e claro, convídanos a abrir camiños de esperanza. CO CORAZÓN FERIDO Ti convídasnos a abrir camiños de esperanza; pero nós moitas veces somos profetas de calamidades, por...

Santos 2024

  Tódolos Santos. 2024 Camiñando na comuñón do Pai, do Fillo e do Espírito Santo Cantos Entrada.-  Benaventurados  ( 118) Lecturas.-  O amor é o meirande  ( 119) Ofertorio.-  Quédate, Señor, connosco   ( 63 ) Comuñón.-  Non vou so   ( 60 )   Ollos para ver          As persoas cristiás celebramos hoxe a festa da esperanza. Non é nin a festa dos disfraces nin a festa do medo, é a festa do agradecemento polo testemuño de vida que nos teñen deixado homes e mulleres, os santos da porta do lado, como diría o papa Francisco, que foron quen de construír comunidade en comuñón. Sabendo unir, escoitar, acompañar e mostrar que na vida, o que nos fai verdadeiramente felices é facer o ben, e non rosmar e estar permanentemente facendo crítica e vendo so o negativo das demais persoas.          E hoxe entón a festa da comuñón no Pai, no Fillo e no espírito...

4 advento 2024

    HUMILDES CARPINTEIRAS E CARPINTEIROS DO BERCE DA SINXELEZA ACOLLEDORA SINAL DE ADVENTO Completamos o noso berce.   CANTO GOZOSO o    ENTRADA:  Volve Señor (Nº 90) o    LECTURAS:  Vén axiña visitarnos (Nº 86) o    OFERTORIO:  Recibe, Señor (Nº 31) o    COMUÑÓN:  No colo de miña nai (Nº 49)   OLLOS DE ESPERANZA              Belén era unha aldea pequeniña, un lugar que pasaba totalmente desapercibido e que semellaba pouco ou nada importante. Ata que unha noite converteuse en lugar de salvación e acollida, porque alí naceu o Fillo de Deus. Neste cuarto e derradeiro domingo do Advento, Belén quere ser para todas e todos nós un recordatorio claro de que Deus está no sinxelo, no humilde, na xente máis esquecida e que, ao igual que Belén, é moitas veces invisibilizada e marxinada.    CORAZÓN MISERICORDIOSO ·      ...