Ir al contenido principal

Remol e a Nota Espiscopal

            Salvo en situacións moi excepcionais, nas que estean en xogo de maneira colectiva os dereitos fundamentais da persoa e da sociedade, a autoridade eclesiástica non pode sinalar a obrigación moral de votar nun determinado sentido. En todo caso, á vez que recoñecemos e defendemos a liberdade de opción política dos cristiáns, temos que insistir tamén na obrigación que todos temos de exercer este dereito coa  máxima responsabilidade moral, tendo en conta o conxunto de bens materiais, morais e espirituais que constitúen o ben común da nosa sociedade. ( 122. CATÓLICOS EN LA VIDA PÚBLICA)

 

Hai uns días, a permanente da Conferencia Episcopal Española emitía unha nota coa que quería invitar aos católicos a emitir un voto responsable e maduro nas próximas eleccións. Sen negarlles aos bispos a liberdade de facelo, tamén nós, os que facemos Remol, cristiáns cheos de esperanza e ilusionados na tarefa de ir construíndo pequenos anaquiños de sociedade desde a semente gozosa da dignidade humana e fidelidade ao Reinado de Deus, queremos manifestar a profunda tristura que, coma seguidores de Xesús, nos produciu a nota da Permanente dos bispos españois.

            Se como tantas veces dicimos, e o dicimos porque o cremos, que o Evanxeo non se pecha na súa totalidade detrás das siglas de ningún partido político, tal e como nolo volve lembrar a Gaudium et Spes no ano 1965,cando afirma: “O cristián debe recoñecer a lexítima pluralidade de opinións temporais discrepantes e debe respectar aos cidadáns que, agrupados defenden lealmente a súa maneira de ver” (G.S 75).Posteriormente na Octogesima Adveniens, Paulo VI, volvía a insistir no mesmo ao escribir: “nas situacións concretas, e tendo en conta as solidariedades que cada quen vive, é necesario recoñecer unha lexitima variedade de opcións posibles. Unha mesma fe cristián pode conducir a compromisos diferentes…cada quen deberá probarse e deberá facer xurdir aquela verdadeira liberdade en Cristo que abre o espírito das persoas ao universal no seo mesmo das igrexas particulares(O.A.50).

            Na Nota da Permanente dos bispos, non acabamos de ver reflectida esta pluralidade e o respecto á libre decisión dos crentes á hora de elixir os que han ser os seus representantes no Parlamento do país. Ao contrario, pensamos que en vez de contribuír ao sosego e á reflexión para a emisión dun voto responsable, atopamos un texto que alporiza aos que non son católicos, e decepciona, mesmo entristece, a cantos na comuñón eclesial, queremos estar no medio do mundo desde o esforzo de facelo máis xusto, humano e solidario.

            Á luz do que vimos manifestando, nós, o equipo que formamos Remol, queremos salientar os criterios que nos ofrece o Pensamento Social Cristián, respecto da responsabilidade do crente á hora de emitir o seu voto :

·        Somos conscientes que a comunidade política e a Igrexa son independentes e deben camiñar no respecto, a colaboración e a autonomía, sen interferir unha no traballo da outra :“A comunidade política e a Igrexa son independentes e autónomas, cada unha no seu propio terreo. Ámbalas dúas, poren, inda que por diverso título, están ao servizo da vocación persoal e social do ser humano”.(G.S. 76)

·        Loar e agradecer a dispoñibilidade e entrega de tantos cristiáns que comprometen a súa vida ao traballo público desde a responsabilidade e desgaste que este traballo supón e esixe: “A Igrexa loa e estima o labor dos que, ao servizo do ser humano, se consagran ao ben da cousa pública e aceptan as cargas deste oficio.(G.S. 75)

·        O dereito e deber de votar para elixir aos nosos representantes nas institucións do Estado, supón: “a todos os cidadáns o dereito e ao mesmo tempo o deber de votar con liberdade para promover o ben común...desde un sentido de responsabilidade” (G.S.75).E como os nosos bispos deixaron escrito no seu documento social “Católicos en la vida pública”, o voto exercerase sen presións de ningunha parte: “En conformidade coa doutrina da Igrexa temos ensinado repetidamente que os católicos deben exercer o seu dereito ao voto con liberdade e responsabilidade” ( C.v.p. 122)

·        A necesidade, á hora de exercer o dereito ao voto, de esforzarnos por ver as cousas dun xeito integral, vencendo a tentación de fixarse só no que é a visión dun grupo ou colectivo determinado. Na nosa sociedade plural e democrática, tamén aconfesional, o respecto que nos ha de merecer tódalas visións, non pode supor o favorecer unha delas. “Os cristiáns todos deben ter conciencia da vocación particular e propia que teñen na comunidade política; en virtude desta vocación están obrigados a dar exemplo de sentido de responsabilidade e de servizo ao ben común, así demostrarán tamén cos feitos como poden harmonizarse a autoridade e a liberdade, a iniciativa persoal e a necesaria solidariedade do corpo social, as vantaxes da unidade combinada coa proveitosa diversidade.(G.S. 75)

·        Desde esta liberdade e responsabilidade, coidamos que seis han ser os criterios a ter en conta á hora de valorar as propostas que os diferentes partidos políticos presentan nos seus programas cara as próximas eleccións ao Parlamento español e ao senado:

 

1.      Respecto  da dignidade humana:Toda dignidade e en todas e cada unha das súas situacións: vida, traballo digno, igualdade de trato, dereito a vivenda, respecto das minorías, atención dos excluídos, atención aos maiores...

2.      Búsquea do ben común: Moitas veces os programas pérdense en propostas que en absoluto buscan o que beneficia a tod@s, máis ben son favorecidos os que máis teñen ou presionan. De aí que á hora de depositar o voto é tan importante saber se aquilo que se reflicte no programa é un ben para a maioría.

3.      A solidariedade: Unha solidariedade real e efectiva que supoña e leve a poñerse no lugar do outro. Nunha sociedade na que son moit@s os que se quedan nas beiras, é fundamental que este criterio ético estea moi presente nas propostas dos programas electorais.

4.      A xustiza: Porque moitas veces se producen situacións que marcan desigualdades e diferenzas, corresponde aos que xestionan o público, aos partidos, traballar para que sexa a xustiza a que guíe as súas decisión, esforzándose sempre por traballar para que a equidade posibilite que tod@s sexan tratados igual.

5.      A Caridade Política.:Só quen é capaz de traballar desde o respecto e a empatía cara o outro, conseguirá facer da acción política un verdadeiro camiño de entrega xenerosa cara os demais. Non ha ser entón nin a profesionalización burocrática nin tampouco o favorecemento dos afíns o que marque a acción política, senón a preocupación humana por facer a vida dos cidadáns o máis fácil e agradable posible.

6.      A participación: En democracia, prestar atención ao que din os cidadáns é o xeito correcto de actuar. Os partidos teñen sempre a tentación de esquecer que os membros elixidos están onde están por mor da decisión dos cidadáns, de aí que é fundamental á hora de emitir o voto, analizar cales son os partidos que potencian e posibilitan a participación dos cidadáns e son receptivos as súas demandas –democracia participativa-, sen caer nun afastamento entre o que o cidadán  vive e necesita,e o que os partidos propoñen e fan.

 

Desde estes criterios, os cidadáns, somos invitados a ser os protagonistas da gran festa da democracia: a elección dos nosos representantes nas institucións públicas. Fagámolo entón desde a liberdade e coa responsabilidade de que o noso voto non debe esquecer a ninguén e ha axudar para que os que menos teñen e poden vexan mellorada a súa situación con leis que posibiliten a superación de atrancos e dificultades.

Non tódolos partidos son iguais e tampouco todos din o mesmo. Fagamos o esforzo do discernimento e da reflexión responsable. So así sairemos gañando a cidadanía.

Comentarios

Entradas populares de este blog

Corpus 2024 B

ALÍ ONDE NOS NECESITAS, ABRIMOS CAMIÑOS Á ESPERANZA (CORPUS 2024) CANTO GOZOSO ENTRADA: Pan do ceo, pan da vida (Nº 54) LECTURAS: Ti es o pan do ceo (Nº 33) OFERTORIO: Quédate, Señor, connosco (Nº 63) COMUÑÓN: O amor é o meirande (Nº 120) PARA NON PERDER O PASO Hoxe é día do Corpus Christi, festa grande. Baixo o lema “Alí onde nos necesitas, abrimos camiños á esperanza” celebramos a xornada da caridade, que nos convida a non esquecer que, sempre e en todo lugar, a Igrexa, cada unha das persoas que a formamos, estamos chamadas a ser servidoras e samaritanas, achegándonos para aliviar, acompañar, escoitar e erguer a tanta xente ferida e tirada nas cunetas da vida. O Señor, que hoxe sae ás nosas rúas, volve dicirnos: “Estou aquí, facendo o camiño contigo”. Abramos o noso corazón para escoitar a súa voz que, dun xeito alto e claro, convídanos a abrir camiños de esperanza. CO CORAZÓN FERIDO Ti convídasnos a abrir camiños de esperanza; pero nós moitas veces somos profetas de calamidades, por...

6 Pascua 2024

  CONSTRUÍNDO CASA COMÚN SEN FACER DISTINCIÓNS NIN PERDER A IDENTIDADE CANTOS ·        ENTRADA:  Con ledicia vimos todos ao altar (Nº 2) ·        LECTURAS:  Cantádelle ao Señor unha cantiga nova (Nº 23) ·        OFERTORIO:  O amor é o meirande (Nº 120) ·        COMUÑÓN:  No colo de miña nai (Nº 49)   AQUECENDO O CORAZÓN              Neste sexto domingo de Pascua invítasenos a prestar atención, poñendo corazón, ollos, mans, pensamento, pés... para vivir facendo do amor cerne da nosa vida. A isto chámanos o Evanxeo de hoxe. Non é doado, sabémolo, pero non podemos renunciar a tentalo, porque só quen se esforza pode recoller logo o froito do seu esforzo.          Cando Xesús fala do amor, non está a teorizar nin tampouco a dicir palabras pa...

5 Pascua 2024

Só sabendo rectificar seremos quen de superar os nosos prexuízos CANTOS * ENTRADA: Que ledos hoxe estamos (Nº 5) * LECTURAS: Escoita ti a palabra de Deus (Nº26 ) * OFERTORIO: Na nosa terra (Nº 36) * COMUÑÓN: Acharte presente na vida (Nº 51) ALENTANDO O CORAZÓN   Dinos a lectura dos Feitos dos Apóstolos que imos proclamar hoxe, que os discípulos de Xerusalén non se fiaban de Saulo, tíñanlle medo, por iso non acababan de crer a súa conversión fose verdadeira. Como lle custaba fiarse daquel que os perseguira e polo que moitos deles acabaron no cárcere! Algo así tamén nos pode pasar hoxe a nós cando facemos da desconfianza a maneira de achegarnos ás demais persoas; cando non nos fiamos do que nos din ou do que fan aqueles que noutro tempo non eran dos nosos. Pero os Apóstolos foron quen de esforzarse por superar os seus prexuízos, e acabaron acollendo e aceptando a Saulo entro os do seu grupo. Que tamén nós saibamos vencer os nosos prexuízos e volver confia...