PAZ: ALGO MÁIS QUE UNHA PALABRA BONITA
Descarga o ficheiro
CANTO GOZOSO
ENTRADA:
Que ledos hoxe estamos
LECTURAS:
Xesús é Señor
OFERTORIO:
No colo da miña nai
COMUÑÓN:
Pan do ceo
ESCOITA ACTIVA
Porque é posible cambiar as cousas e non estancarse no
mesmo de sempre, Pascua quere ser unha invitación a non esquecer esta grande
mensaxe. Vexamos as cousas con ollos novos! Deixemos atrás as nosas tristuras!
Poñámonos a andar! Non teñamos medo. Coma os de Emaús, que tamén nós o poidamos
recoñecer ao partir o pan.
Que a celebración que agora comezamos sexa para nós
alento e forza para no noso camiñar cotián.
CORAZÓN MISERICORDIOSO
û Cando nos sentimos pobres, e esperamos en Ti, SEÑOR,
FAITE PRESENTE NA NOSA VIDA.
û Cando buscamos a verdade e non calamos diante das
inxustizas, CRISTO, FAITE PRESENTE NA NOSA VIDA.
û Cando, dende a humildade e a sinxeleza, ofrecemos a nosa
vida, SEÑOR, FAITE PRESENTE NA NOSA VIDA.
PALABRA ENRAIZADA
o Un
Deus humano: Moitas persoas tenden a clasificar coma ilusorios,
irreais e pantasmais os contidos da fe. Para elas, Xesús Resucitado nada ten
que ver coa esfera da realidade. Porén, a fe cristiá que nace da resurrección é
profundamente realista e nada ten que ver con outras opcións que parecen
esquecerse da realidade. Lucas insiste en que Xesús Resucitado non é unha
pantasma, indicando fisicamente que vive e que toda a súa persoa resucitou; que
non é unha simple lembranza ou idea, senón o mesmo de sempre. É inútil querer
experimentar a resurrección ou recoñecer ao Resucitado se non somos quen de
contemplar as súas chagas, se non somos quen de compartir o que temos para
comer (pan, peixe....) con quen nolo pide. Cada vez que se xunta a comunidade,
cada vez que se proclama a Palabra, cada vez que un pobo traballa pola súa
liberación, cada vez que compartimos cartos, alimentos, comida, tempo; cada vez
que abrimos unha nova fiestra ao futuro; cada vez que superamos o medo, cada
vez que somos testemuñas... aparece Xesús Resucitado, vivo. El está na
humanidade doente que busca nova vida, na comunidade crente que escoita as
Escrituras, no banquete dos que comparten o que teñen para comer e vivir.
o
Que trae a paz: O
seu saúdo é un saúdo de paz, que encerra unha declaración de intencións: nin é
nin nos quere violentos, enfrontados, egoístas, cheos de envexa... nin tampouco
cheos de medo. Fronte dos discípulos, temerosos, o Resucitado danos un exemplo
de entrega, decisión e superación de dificultades.
o
Que vén ao noso
encontro: Xesús escóllenos, chámanos, envíanos...Quere que sexamos
testemuñas da Boa Nova: da paz, da vida, do compartir, da conversión, do
perdón, da verdade...e que isto llo anunciemos a todas as persoas e en todos os
lugares. Podemos ver ao Resucitado no descoñecido, no camiñante, no peregrino,
no próximo.... A que esperamos?.
FRATERNIDADE ORANTE
Diante túa, Señor, que
te fas presente ao partir o pan e na comunidade reunida, presentamos agora a
nosa oración comunitaria dicindo:
QUE LEVEMOS A
ESPERANZA DA RESURRECCIÓN AO NOSO MUNDO
Pola Igrexa, para que
mostremos a Xesús Resucitado dende unha actitude de achegamento, diálogo e
respecto, valorando sempre o positivo que todas as persoas temos, OREMOS:
QUE LEVEMOS A
ESPERANZA DA RESURRECCIÓN AO NOSO MUNDO
Polas nosas
comunidades, que sexamos persoas de paz, sementadoras de esperanza, unión e
reconciliación para así sermos quen de mostrar o amor de Deus con palabras e
con feitos cribles, e non con ritos superficiais e baleiros, OREMOS:
QUE LEVEMOS A
ESPERANZA DA RESURRECCIÓN AO NOSO MUNDO
Por tod@s nós, para
que sexamos profetas de optimismo e de esperanza no medio dun mundo ferido de
morte e desesperación, OREMOS:
QUE LEVEMOS A
ESPERANZA DA RESURRECCIÓN AO NOSO MUNDO
Grazas, Señor, porque segues aparecendo nas nosa vidas e
animando a nosa existencia coa túa vida e co teu espírito. PXNS. Amén
MIRADA
DE ESPERANZA
Porque Cristo resucitou,
cremos na vida, para sempre.
Porque Cristo resucitou,
non cremos en morte ningunha para quen queira vivir.
Porque Cristo resucitou,
cremos nel.
Porque Cristo resucitou,
a forza do presente é o futuro.
Porque Cristo resucitou,
o mundo está en marcha
e non o pararán os intereses dos vencedores.
Porque Cristo resucitou
temos que construír unha cidade sen clases,
na que as persoas sexamos compañeiras e irmás.
Porque Cristo resucitou,
hai un amor e unha casa para todos.
Porque Cristo resucitou,
cremos nunha terra nova.
...E, porque cremos e esperamos,
non temos nada que conservar;
e afirmamos que o mellor xeito de conseguilo todo
é perdelo todo por unha soa causa.
Comentarios