Ir al contenido principal

1 Domingo Coresma 2022

 ATA QUE A IGUALDADE SEXA COSTUME

SINAL DE CORESMA

Comezamos o tempo de Coresma. Un tempo forte que a liturxia católica volve ofrecernos para celebrar a Pascua co corazón e as actitudes dispostas a non deixarnos levar da rutina nin polo desacougo. Desde aquí, neste camiño coresmal iremos tentando de responder á seguinte cuestión: “Que nos produce bágoas no corazón, dentro e fóra da Igrexa?”. Cada semana iremos colocando unha bágoa que provoca sufrimento. Esta primeira semana, como non pode ser doutro xeito, colocamos unha bágoa coa palabra GUERRA.

CANTO GOZOSO

ENTRADA: Déixate querer (Nº 61)
LECTURAS: Todos xuntos (Nº 56)
OFERTORIO: Sede a sal, sede a luz
COMUÑÓN: Ide e pregoade (nº 55)

PARA NON PERDER O PASO

O pasado mércores comezamos o tempo de Coresma, tempo de conversión e de deserto, tempo de mirar cara dentro para curar as feridas que impiden que o noso corazón latexe enchoupado de misericordia.
Que nos produce bágoas no corazón, dentro e fóra da Igrexa? Esta é a pregunta que se nos invita a respostar neste camiño coresmal. Hoxe, neste primeiro domingo, no que escoitamos o berro da xente de Ucrania, no que os estoupidos das bombas resoan nos nosos ollos, nos nosos oídos e no noso corazón, colocamos a primeira bágoa: a que nos produce a senrazón da guerra que sega a vida de tantas persoas inocentes que se ven condenadas ao exilio, ao esquecemento e á escuridade.
Porque non hai camiño para a paz, senón que a paz é o camiño, comezamos a nosa celebración poñéndonos nas mans e na presenza do Deus da paz e da misericordia.

CO CORAZÓN FERIDO

· Polas moitas veces nas que sementamos bágoas e dor na vida das persoas excluíndoas, silenciándoas, invisibilizándoas; SEÑOR, QUE RECOÑEZAMOS OS NOSOS ERROS.
· Por ter esquecido que Xesús quixo unha comunidade de iguais, sen ningún tipo de discriminación; CRISTO, QUE RECOÑEZAMOS OS NOSOS ERROS.
· Porque pedimos a paz pero as nosas palabras e os nosos actos son moitas veces armas de destrución; SEÑOR, QUE RECOÑEZAMOS OS NOSOS ERROS.

ESCOITANDO A TÚA PALABRA

PROCLAMACION DA PALABRA RECOLLIDA NO LIBRO DO DEUTERONOMIO

O sacerdote collerá a cesta da túa man e poraa diante do altar do Señor, o teu Deus. Entón ti tomarás a palabra e dirás diante do Señor, o teu Deus: Meu pai era un arameo errante, que baixou a Exipto, onde residiu como emigrante con pouquiña xente, que o acompañaba. Alí converteuse nun pobo grande, poderoso e numeroso. Pero os exipcios maltratáronnos, oprimíronnos e impuxéronnos cruel servidume. Entón chamamos polo Señor, Deus de nosos pais, e o Señor escoitou o noso clamor e viu a nosa opresión e o noso duro traballo. Logo o Señor fíxonos saír de Exipto con man forte e brazo estendido, con grande terror, con sinais e con feitos marabillosos, e fíxonos entrar neste santuario e entregounos esta terra, terra que deita leite e mel. Por isto, velaí que agora eu trouxen as primicias dos froitos da terra que ti me deches, Señor.
PALABRA DO SEÑOR
GRAZAS A DEUS

PROCLAMACION DA PALABRA RECOLLIDA NA CARTA DE PAULO AOS ROMANOS

Irmás e irmáns:
- ¿Que di, logo, positivamente a Escritura?
Cerca de ti está a palabra, na túa boca e no teu corazón. Esa é a palabra da fe que anunciamos. Porque, se confesas coa túa boca que Xesús é Señor e cres de corazón que Deus o resucitou dos mortos, serás salvo. Pois é crendo co corazón como se chega á xustificación; e é confesando coa boca como se chega a salvación. Porque di a Escritura: todo o que crea nel non quedará defraudado. Pois non hai diferenza entre o xudeu e o grego, xa que un mesmo é o Señor de todos, rico para todos os que o invocan; porque todo o que invoque o nome do Señor será salvo.
PALABRA DO SEÑOR
GRAZAS A DEUS

PROCLAMACION DA BOA NOVA DO NOSO SEÑOR XESUCRISTO SEGUNDO LUCAS

Entón Xesús, cheo de Espírito Santo, volveu do Xordán, e o Espírito levouno deserto adiante, durante corenta días, onde o tentou o Satán. Naqueles días non probou bocado, pero ó cabo deles sentiu fame. E díxolle o Satán:
- Se es o Fillo de Deus, manda que estas pedras se volvan pan.
Respondeulle Xesús:
- Está escrito: O home vive de algo máis ca de pan.
Despois levouno a un outeiro e mostroulle nun intre todos os reinos do mundo. Díxolle o Satán:
- Dareiche todo o seu poder e toda a súa gloria, porque mos entregaron a min e doullos eu a quen quero: Se me adoras todo será teu.
Respondeulle Xesús:
- Escrito está: Adorarás o Señor, o teu Deus, e só a El darás culto.
Levouno logo a Xerusalén e plantouno no cumio do templo e díxolle:
- Se es o Fillo de Deus, bótate de aquí abaixo, 10que está escrito: Mandará ós seus anxos para que te garden; e tamén: 11Levarate nas súas mans para que non se manquen quen os teus pés nas pedras.
Xesús respondeulle:
- Está mandado: Non tentarás o Señor, o teu Deus.
E rematadas as tentacións, o Satán deixouno ata o tempo axeitado.
PALABRA DO SEÑOR
GLORIA A TI, SEÑOR XESÚS

UNHA PALABRA QUE AGROMA

Escoitabamos hoxe na primeira lectura unha sentencia que nos fala da actualidade da Palabra: “chamamos polo Señor, Deus de nosos pais, e o Señor escoitou o noso clamor e viu a nosa opresión e o noso duro traballo”. Esta é a frase desde a cal queremos comezar este tempo de coresma. Queremos escoitar o clamor que cada día vemos e escoitamos ao noso carón e tamén máis alá das nosas fronteiras. Queremos escoitar o clamor das persoas que son maltratadas pola guerra, das persoas que son obrigadas a abandonar o seu país, a súa familia. Queremos escoitar o clamor das persoas que son desposuídas da súa dignidade. E escoitar este clamor non pode quedar nun mero formalismo, nun laio permanente, senón que esixe de nós un cambio de actitudes e un compromiso fondo coas causas xustas do noso mundo. A chamada que se nos fai hoxe desde Ucrania non pode quedar sen resposta, senón debe concretarse nunha resposta en forma de solidariedade e condena da guerra, de todas as guerras.
Porque na base da guerra sempre está a ansia de poder, de dominio. Que ben nolo lembra o evanxeo de hoxe co episodio das tentacións. Crernos mellores, xogar a ser pequenos deuses, poder controlar e dominar todo. Mais ese é sempre un camiño equivocado, porque o que nos fai verdadeiramente felices, o que enche a nosa vida de sentido é traballar pola inclusión e pola fraternidade, seguindo o viero que nos abriu Xesús, que non xulgaba, que non desprezaba, que non excluía, senón que integraba, sumaba e acollía. Oxalá esta coresma nos faga reflexionar e endereitar o rumbo.
E cando xa peta na nosa porta o 8 M, o Día Internacional da Muller, estamos chamadas e chamados a reflexionar sobre o papel das mulleres na Igrexa. Mais alá da tentación fácil de facernos “los ofendiditos” e escandalizarnos porque “as mulleres queren ser curas, era o que nos faltaba”, máis alá disto unha cousa está clara: sendo maioritaria a nosa presenza nas celebracións, como catequistas, nos grupos parroquiais, no voluntariado... estamos vetadas nos órganos que toman decisións. Cantas mulleres vemos representando á institución?, cantas teólogas traballan nas facultades de Teoloxía ou como formadoras nos seminarios?, cantas mulleres teñen voz na toma de decisións que lle afectan a toda a comunidade eclesial?... As mulleres sempre estamos baixo sospeita, sempre somos as tentadoras, sempre somos as reducidas ao silencio, á invisibilización, ao esquecemento. Mais non foi esta a comunidade na que pensou Xesús, quen transgride as normas dunha sociedade fondamente patriarcal. Xesús discutiu de teoloxía coa samaritana, escoitou o berro da muller cananea, conmoveuse polo pranto da viúva de Naím, acolleu ás mulleres no grupo de persoas que o seguiron. As primeiras comunidades cristiás, seguindo o camiño aberto por Xesús, fixeron da igualdade entre homes e mulleres unha das achegas máis radicais á historia da humanidade. Xa é tempo de recuperar todo isto para que a igualdade sexa costume.

DESDE A ORACIÓN COMPARTIDA

Sabedores do valor e da forza da oración comunitaria, rezamos xuntos dicindo:
SEÑOR, NON NOS DEIXES CAER NA TENTACIÓN

  • Para que todas as persoas que conformamos a Igrexa e que sentimos que Xesús é guieiro das nosas vidas non permanezamos indiferentes ao berro de quen sofre por mor da guerra, OREMOS.
  • Pola paz no mundo, para que cese a guerra e sexamos capaces de descubrir que non hai camiño para a paz, senón que a paz é o único camiño, OREMOS.
  • Para que esta Coresma sexa para toda a Igrexa un camiño de deserto, no que, mirando cara dentro e cara fóra sexa capaz de descubrir o traballo a prol da igualdade como tarefa, reto e compromiso, OREMOS.
  • Para que non caiamos na tentación de facer nas nosas comunidades guetos que exclúen a quen é diferente; OREMOS. 
  • Para que non deixemos que o corazón se nos endureza coa pedra que nos fai insensibles á dor e tristura das persoas que nos necesitan, OREMOS.

Señor, sabémonos necesitados de Ti, e moitas veces caemos na tentación de esquecerte. Dános azos para non deixarnos ir por este camiño. PXNS. Amén.

PARA QUE TODOS SINTAMOS A LEDICIA DO COMUNITARIO

IMAXINAMOS E CONSTRUÍMOS UNHA IGREXA NOVA
- Unha Igrexa que é comunidade de iguais, onde a muller é recoñecida como suxeito de pleno dereito, con voz e voto en todas partes, onde a muller é valorada polos seus talentos, carismas e achegas ás comunidades.
- Unha Igrexa na que o liderado é compartido entre mulleres e homes, leigas e leigos, persoas consagradas e sacerdotes.
- Unha igrexa paritaria, máis plural e menos xerárquica.
- Unha Igrexa que acompaña sen xulgar toda a diversidade de familias, identidades e orientacións sexuais.
- Unha Igrexa onde as mulleres xa son/somos, e recoñecémonos con autoridade e liderado.
- Unha Igrexa que xa hoxe é semente de futuro.
Vimos de lonxe, somos moitas e alzamos a voz para dicir abonda e esixir unha Igrexa nova que este 6 de marzo de 2022 dá un novo paso adiante.
(Do Manifesto da Revolta das Mulleres na Igrexa. Marzo 2022)

Comentarios

Entradas populares de este blog

Corpus 2024 B

ALÍ ONDE NOS NECESITAS, ABRIMOS CAMIÑOS Á ESPERANZA (CORPUS 2024) CANTO GOZOSO ENTRADA: Pan do ceo, pan da vida (Nº 54) LECTURAS: Ti es o pan do ceo (Nº 33) OFERTORIO: Quédate, Señor, connosco (Nº 63) COMUÑÓN: O amor é o meirande (Nº 120) PARA NON PERDER O PASO Hoxe é día do Corpus Christi, festa grande. Baixo o lema “Alí onde nos necesitas, abrimos camiños á esperanza” celebramos a xornada da caridade, que nos convida a non esquecer que, sempre e en todo lugar, a Igrexa, cada unha das persoas que a formamos, estamos chamadas a ser servidoras e samaritanas, achegándonos para aliviar, acompañar, escoitar e erguer a tanta xente ferida e tirada nas cunetas da vida. O Señor, que hoxe sae ás nosas rúas, volve dicirnos: “Estou aquí, facendo o camiño contigo”. Abramos o noso corazón para escoitar a súa voz que, dun xeito alto e claro, convídanos a abrir camiños de esperanza. CO CORAZÓN FERIDO Ti convídasnos a abrir camiños de esperanza; pero nós moitas veces somos profetas de calamidades, por...

Santos 2024

  Tódolos Santos. 2024 Camiñando na comuñón do Pai, do Fillo e do Espírito Santo Cantos Entrada.-  Benaventurados  ( 118) Lecturas.-  O amor é o meirande  ( 119) Ofertorio.-  Quédate, Señor, connosco   ( 63 ) Comuñón.-  Non vou so   ( 60 )   Ollos para ver          As persoas cristiás celebramos hoxe a festa da esperanza. Non é nin a festa dos disfraces nin a festa do medo, é a festa do agradecemento polo testemuño de vida que nos teñen deixado homes e mulleres, os santos da porta do lado, como diría o papa Francisco, que foron quen de construír comunidade en comuñón. Sabendo unir, escoitar, acompañar e mostrar que na vida, o que nos fai verdadeiramente felices é facer o ben, e non rosmar e estar permanentemente facendo crítica e vendo so o negativo das demais persoas.          E hoxe entón a festa da comuñón no Pai, no Fillo e no espírito...

4 advento 2024

    HUMILDES CARPINTEIRAS E CARPINTEIROS DO BERCE DA SINXELEZA ACOLLEDORA SINAL DE ADVENTO Completamos o noso berce.   CANTO GOZOSO o    ENTRADA:  Volve Señor (Nº 90) o    LECTURAS:  Vén axiña visitarnos (Nº 86) o    OFERTORIO:  Recibe, Señor (Nº 31) o    COMUÑÓN:  No colo de miña nai (Nº 49)   OLLOS DE ESPERANZA              Belén era unha aldea pequeniña, un lugar que pasaba totalmente desapercibido e que semellaba pouco ou nada importante. Ata que unha noite converteuse en lugar de salvación e acollida, porque alí naceu o Fillo de Deus. Neste cuarto e derradeiro domingo do Advento, Belén quere ser para todas e todos nós un recordatorio claro de que Deus está no sinxelo, no humilde, na xente máis esquecida e que, ao igual que Belén, é moitas veces invisibilizada e marxinada.    CORAZÓN MISERICORDIOSO ·      ...