En tempo de crise, Advento é Amor
Signo:
Nun taboleiro colocamos unha cartolina na que pegamos ou escribimos a frase que eliximos como lema para o Remol ao longo de todo o tempo de Advento: "En tempo de crise, Advento é amor". Farémolo deixando un oco no centro. Logo, ao longo de cada un dos catro domingos iremos axuntando no oco que deixamos un dos pétalos en forma de corazón que conforman o logotipo de Cáritas. Deste xeito, ao final do tempo de Advento, e como remate do camiño de renovación interior ao que nos invita este tempo forte que agora iniciamos, presentarémoslle ao Deus que nace en nós e no mundo un corazón, noso e de tod@s, expresión do amor co que queremos ir loitando contra da crise, non só económica, que estamos a vivir.
(Para darlle unidade a este tempo litúrxico, utilizaremos a mesma resposta no perdón e na oración da comunidade durante os catro domingos. Asemade, tamén propoñemos os mesmos cantos ao longo de todo o tempo).
PÓRTICO
Un dos grandes problemas da nosa sociedade quizá sexa o da monotonía, a rutina, a falla de ilusión. Témolo todo e todo nos aburre: grandes charlatáns, grandes proclamas publicitarias, tanta crise que non dá pasado… Faltan ilusión e esperanza na nosa vida, necesitamos espertar do soño da nosa mediocridade, da nosa monotonía e apatía. O Advento que comezamos hoxe é un tempo de soños e promesas, unha luz que rompe a noite da desesperanza. Catro corazóns que iremos mostrando como un camiño, o camiño do AMOR, o camiño de Xesús. Catro corazóns que queren expresar o amor de Deus que chega para todos as persoas e que se nos vai mostrando neste tempo. Oxalá sexamos quen de experimentalo e de dalo aos demais de xeito renovado e dinámico.
O PERDÓN
- Porque queremos camiñar polos vieiros que renoven e ilusionen a nosa vida, SEÑOR, QUE NOS ABRAMOS Á CONVERSIÓN.
- Porque queremos esforzarnos para que a túa visita atope a casa do noso corazón e da nosa vida limpa e preparada para acollerte, CRISTO, QUE NOS ABRAMOS Á CONVERSIÓN.
- Porque estamos dispostos a limpar os oídos para poder escoitar, con claridade e sen interferencias, a túa voz que nos fala de preparar camiños e desterrar indiferenzas. SEÑOR, QUE NOS ABRAMOS Á CONVERSIÓN
REMUÍÑO
- ADVENTO SEMPRE NOVO: Comezamos, un ano máis, o tempo do Advento, tempo de espera e esperanza, tempo de ser conscientes da nosa vida, de que vivimos non na rutina e no tedio senón na consciencia do noso compromiso como cristiáns. Pero teñamos coidado para que este tempo non quede só no externo, no pasaxeiro. Advento é algo máis, advento é unha actitude profunda. Advento é dicir vixilancia, espera, compromiso, valentía, alegría, sinxeleza, paz e amor. Advento é saír dun mesmo e arriscar na busca de Xesús no outro. Advento é unha busca constante para atoparnos a nós mesmos, para ilusionarnos e ser capaces de darnos, de amar: para erguer ao que está caído, para poñer palabras de consolo, para encher tanta soidade e tanto corazón baleiro. Ser profetas de tempos novos, de ilusión.. de Amor.
- ADVENTO É ESPERA: Neste tempo convén que nos preparemos para ser humildes, agradecidos, confiados. A paciencia axudaranos a madurar, a fortalecernos, a crecer. Tan fartos estamos de non pensar, de pasar pola vida polo aire, que convén que nos paremos, que fagamos un descansiño para ser conscientes da realidade. E esta paciencia fai que tamén esperemos desexando. Desexando que a nosa vida sexa unha entrega, que o Reino se faga presente xa agora, que a Igrexa se renove á luz dos máis pobres e que ante todo, este Advento sexa un tempo de graza. Desexamos a xustiza. A xustiza é a plenitude do amor, é o reino que vén a todos nós. A xustiza que leva a comprometernos dende o pequeno da nosa vida, dende o cotiá. Sen correr o perigo de botarnos atrás por non ver os resultados. Unha gran cantidade de pequenos compromisos transforma o mundo e ademais, non estamos sos, por iso queremos:
- Recoñecer a nosa pobreza, o nos baleiro.
- Recoñecer que nós sos non podemos acadar as nosas metas.
- Ser persoas de grandes desexos.
- Ser pacientes e perseverantes e non caprichosos.
- Estar vixiantes e atentos a calquera xesto, voz ou pisada cos ollos e os oídos ben abertos... non sexa que nos pase a oportunidade.
Esperamos a xustiza plena, Xesús. Esperamos un mundo mellor. Esperamos que todos sexamos irmáns e irmás por riba de nacionalidades, crenzas e ideoloxías. Esperamos o triunfo do amor... que hoxe queremos facer visible con este primeiro pétalo do noso corazón do Advento.
ORACIÓN DA COMUNIDADE
Porque o amor é a mellor das respostas coas que podemos prepararnos para acollerte, dicímosche xuntos:
QUE NUNCA TEÑAMOS CRISE DE AMOR
- Que na Igrexa aprendamos tod@s a poñer amor onde hai separación, buscando tender pontes e superar fendas, OREMOS.
QUE NUNCA TEÑAMOS CRISE DE AMOR
- Para que, desde as nosas comunidades, este tempo de advento sexa un tempo que se vaia abrindo en nós, levándonos a camiñar na luz; a luz que nos descubre que no mundo no que vivimos, tod@s sen excepción, temos moita tarefa por facer, OREMOS.
QUE NUNCA TEÑAMOS CRISE DE AMOR
- Porque queremos facer deste tempo de Advento un tempo de revisión persoal, que nos leve a descubrir que son moitas as cousas que temos que deixar atrás para poder entender que a Luz chega tendo nome: Xesús, Oremos.
QUE NUNCA TEÑAMOS CRISE DE AMOR
Señor, que saibamos ir deixando atrás canto nos fai seguir camiñando na escuridade e impedindo poder comezar a descubrir que a luz é esperanza e máis amor. P.X.N.S. Amén.
PARA A REFLEXIÓN
Este é o tempo da espera, do desexo e da ilusión.
É un tempo de ollos abertos,
de olladas longas coma o abrente
e de pasos lixeiros por outeiros e vales.
É o tempo das salas de espera,
dos soños bos que soñamos
e dos embarazos da vida.
É tempo de anuncios, pregóns e sobresaltos,
de vixías, gardiáns e carteiros,
de trobadores e profetas.
É tempo de pobres e emigrantes,
de cadeas e cárceres rotos
e de follas con boas novas.
É tempo de Isaías, Xoán Bautista e María;
e de Xosé quitando pantasmas,
embarcado na aventura e pasando as noites en vela.
En tempo de crise..... Advento é tempo de amor.
CANTOS
- ENTRADA: Vén axiña visitarnos
- LECTURAS: Preparade o camiño ao Señor
- OFERTORIO: Ti es camiño e verdade
- COMUÑÓN: Xesús chamado amigo/Maranatá
Comentarios