Ir al contenido principal

4 Domingo Pascua 2016 C


GRAZAS, PASTOR BO POR ACOMPAÑAR AS NOSAS PEGADAS
Descarga o ficheiro

CANTO GOZOSO
·      ENTRADA: Camiñando pola vida (Nº 9)

·      ASPERSIÓN: A auga do Señor (Nº 124)
·      LECTURAS: O Señor é o meu pastor (Nº 27)
·      OFERTORIO: Grazas, Señor, graciñas (Nº 50)
·      COMUÑÓN: Ide e pregoade (Nº 55)
ESCOITA ACTIVA
O Pastor bo, Xesús, convócanos este domingo para volver compartir a nosa fe de maneira comunitaria, ledos e agradecidos. Sabemos que non estamos solos, que ao noso lado sempre hai alguén, que no nome do Señor, nos tende a man, nos dedica un pouco dos seu tempo, nos alenta e anima cunha palabra de esperanza ou cun sorriso sincero e de cercanía. Agradezamos ao noso Pastor que se teña preocupado por nós, facendo posible que a súa mensaxe nos chegue a través das pequenas cousas de cada día que imos compartindo cos que nos fan a vida máis doada e agradable. Celebrémolo reunidos no seu nome con aquelas persoas coas que compartimos a mesma fe e celebramos a mesma esperanza.
CORAZÓN MISERICORDIOSO
(Aspersión)
·       Polas veces nas que o cansanzo ou a preguiza nos apartan de seguir os teus pasos; SEÑOR, ALENTA A NOSA CONVERSIÓN.
·       Porque temos oídos para todo e todos, pero non para Ti e a túa mensaxe de non excluír nin dividir; CRISTO, ALENTA A NOSA CONVERSIÓN.
·       Para que non deixemos que a rutina, o costume ou a falta de ilusión endurezan o noso corazón e nos convertan en seguidores de tradicións pero non de convicción; SEÑOR, ALENTA A NOSA CONVERSIÓN.
OLLOS ABERTOS E PÉS NO CHAN
·      E pouco a pouco este saír de nós mesmos para achegarnos ao mundo, iranos axudando a tomar conciencia de que somos comunidade, pobo en camiño, Igrexa. Unha Igrexa que é guiada polo seu Pastor: Xesús. Un Pastor que escoita, coñece, quere e sempre acompaña. A todos nos ten pasado que nos van fallando as persoas, pero quen nunca falla é El: non cansa, non dá as costas, non fai segundas nin terceiras lecturas cheas de prexuízos e dobres intencións, non xoga a facer interpretacións do que dicimos. El móstrase como é, sen teatralidade nin aparencia, o que supón que non engana a ninguén: sae ao encontro e achégase, non busca outra cousa, por iso nel atopamos a forza e o testemuño que nos chama a ser nós mesmos sen deixarnos manipular por ninguén; pero tamén sen pretender manipular a ninguén. Seguimento en estado puro é o que nos pide. De nós, única e exclusivamente de nós, vai depender que respondamos ou non.
·      E como vai depender de nós, temos que estar atentos á súa palabra, ao seu xeito de facer as cousas, á súa maneira de ir mostrando que o seguimento non é imitación, non é repetir o que El fixo ou facer os seus mesmos xestos. Nin hoxe é o tempo de Xesús nin o xeito de percibir e comprender a realidade e parece en nada ao daquel tempo. Pero si teremos que responder facendo o esforzo por facer comprensible, desde o noso testemuño, toda a riqueza da súa mensaxe. Porque esta nin pertence nin a un tempo nin a unha cultura concreta. É universal, é para tod@s e é para sempre. Por iso, como Pastor bo e preocupado polos seus, sempre está a carón de nós. Non nos corta a liberdade para actuar con criterio, non nos manipula para que digamos o que outros nos mandan dicir, senón que nos chama a crecer en liberdade, a pensar con responsabilidade e a discernir con madurez. Que mellor resposta ao agasallo que nos fai de ser o noso Pastor!
RENOVACIÓN PROMESAS BAUTISMAIS
(Propoñemos facer a renovación das promesas bautismais durante todos os domingos da Pascua. A poder ser, farémola desde a fonte bautismal)
Renovemos agora persoal e comunitariamente esta fe que hoxe celebramos cheos de esperanza e vida:
Estades dipost@s a loitar contra o mal que nos fai infelices e nos pecha no egoísmo?. Si, estou dispost@.
Estades dispost@s a non deixarvos levar de canto nos aparta de Deus e fire aos irmáns?. Si, estou dispost@.
Estades dispost@s a que no voso corazón non aniñen a cobiza, a insolidariedade e a envexa?. Si, estou dispost@.
Credes en Deus Pai e amigo da vida, que puxo nas nosas mans o mundo que el creou?. Si, creo.
Credes en Xesús, o seu Fillo, que naceu de Santa María, pasou polo mundo facendo o ben, e que no seu amor e fidelidade entregou a súa vida para abrirnos a nós o camiño da resurrección?. Si, creo.
Credes na forza e presenza do Espírito Santo, na Igrexa comunidade de fe e vida, na comuñón dos santos, no perdón e na resurrección que nos levará a gozar para sempre da presenza de Deus?. Si, creo.
Pai, que esta fe que acabamos de proclamar e confesar sexa sempre para nós alento e esperanza no camiño da nosa vida. P.X.N.S. Amén.
FRATERNIDADE ORANTE
Xesús, o Pastor bo, invítanos agora a compartir a oración comunitaria, respondendo a esta invitación, dicimos xunt@s:
PASTOR BO, ALÉNTANOS NO NOSO CAMIÑO
Pola Igrexa, para que todos cantos a formamos non esquezamos nunca que a fidelidade ao Pastor esíxenos o esforzo de ser testemuñas da súa mensaxe coas nosas accións, as nosas palabras e a superación da indiferenza ante a dor e a tristura dos demais, OREMOS
PASTOR BO, ALÉNTANOS NO NOSO CAMIÑO
Para que as nosas comunidades crezan, maduren e se fagan adultas na fe desde o testemuño coherente, responsable e maduro dos seus pastores, OREMOS.
PASTOR BO, ALÉNTANOS NO NOSO CAMIÑO
Para que cada un e cada unha de nós, seguindo a invitación do noso Pastor Xesús, saibamos acompañar a quen poida necesitarnos: enfermos, tristes, solos, desenganados... esquecidos, OREMOS.
PASTOR BO, ALÉNTANOS NO NOSO CAMIÑO
Grazas, Señor, por esta invitación a seguir as túas pegadas de recoñecemento e acollida ante as dificultades e problemas nas que viven os que están ao noso lado, e que esperan de nós unha man que os acompañe e axude a superar dificultades e desilusións. PXNS. Amén.
MIRADA ESPERANZADA
Pai, hoxe queremos dar grazas desde a alegría e a esperanza por ter compartido comunitariamente a celebración do día do bo Pastor, Xesús, o teu Fillo.
Grazas por darnos azos para non abandonar ante as dificultades e problemas que cada día imos atopando.
Grazas pola forza coa que nos alentas para non deixar que agromen en nós actitudes de tristeza, desilusión ou desesperanza.
Grazas porque segues a mostrarte ante nós coma o Pai que pon ao noso lado ao Pastor bo que ofrece vida, amor e solidariedade.
Grazas porque a pesares das moitas voces coas que cada día nos atopamos, non deixas que a túa se apague no noso corazón.
Grazas, Pai, porque nas encrucilladas da vida, cando temos que elixir e decidir, sempre estás preto para, acertemos ou non, non deixarnos solos.
Grazas, porque desde a entrega xenerosa da vida convertida en testemuño, móstrasnos ao papa Francisco como referencia desde a que vivir o evanxeo como a ledicia do amor. Amén.

Comentarios

Entradas populares de este blog

Domund 2023

Corazóns aquecidos, Pés no camiño Cantos Lecturas.-  Misioneiro serás  ( 115 ) Entrada.-  Como che cantarei  (8 ) Ofertorio.-  Recibe, Señor  ( 31 )  Comuñón.-   Acharte presente  ( 51 ) Mirada agradecida             A Xornada Mundial das Misións, que en España chamamos DOMUND, é o día no que a Igrexa reza dun xeito moi especial pola evanxelización no mundo e lémbranos que todas e todos estamos chamados a participar activamente na misión.        Oración e axuda solidaria forman unha unión inseparable, porque como crentes non podemos rezar sen comprometernos solidariamente coas nosas accións, pero tampouco podemos facer accións solidarias se non as facemos xurdir da oración persoal e comunitaria.        Neste día, e do mellor das maneiras, a Igrexa mostra a súa universalidade sen fronteiras para tender a man e poñer o corazón, desde a mirada de Deus, en tódalas persoas que, dun cabo ao outro do mundo, o precisen. Palabra de misericordia ·        Porque son moitas as veces nas que nos fa

2 Pascua 2023

A paz é  camiño  de  e speranza e resurrección   ( Pódese, ad libitum, facer a aspersión no momento penitencial) Cantos •  Entrada.-  Que ledicia miña ( Nº 4 ) •  Lecturas.-   Canta   Aleluia ( Nº 21 ) •  Ofertorio.-  Recibe Señor ( Nº 31 ) •  Comuñón.-  Gracias, Señor, graciñas ( Nº 50 )   Mirada agradecida   ​ O tempo de Pascua é tempo de testemuño e esperanza compartida. O primeiro, o testemuño, vano dando os seguidores e seguidoras de Xesús a medida que van vencendo os seus medos e comezan a saír e  compartir  coa veciñanza que Cristo vive; que a súa vida foi semente de vida nova e alegría que precisaban anunciar. E é  esperanza  porque esa alegría é froito da presenza, sempre alentadora, de Xesús na súa  cotidianeidade. Xesús non é o ausente ao que se lle recorda, ao contrario, é presenza viva que fai reactivar a aqueles e aquelas que o coñeceron e acompañaron . Deste xeito pouco a pouco  foron  vencendo medos e dúbidas; deste xeito, tamén nós recibimos tamén a invitación de ser h

Vixilia Pascual 2023

       1      5)     LITURXIA DA EUCARISTÍA  ð   OFERTORIO  ð   SANTO  ð   NOSO PAI  ð   PAZ  ð   COMUÑÓN  ð   MIRADA ESPERANZADA   ð   DESPEDIDA  ð     6)     CANTO GOZOSO •         Ao prender o lume : A Cristo cantamos (Nº 110)  •         Na procesión cara o templo : Amigos nas penas  •         Lecturas  o   1º Ergo os meus ollos cara aos montes (Nº 112)   o   2º Pai, Pai, póñome nas túas mans  o   3º As túas Palabras, Señor, son espírito e vida  o 4º Benaventurados (Nº 119)  o   Canta Aleluia (Nº 21)  •         Aspersión:  A auga do Señor (Nº 124) •         Ofertorio : Sementar, sementarei  •         Santo:  Santo es ti (Nº 39)  •         Noso Pai : No camiño do amor (Nº 43)  •         Comuñón : Grazas, Señor, graciñas (Nº 50)   •         Canto final á Virxe:  Boas noites (Nº 70)      P ORQUE A MORTE FOI VENCIDA ,  FAGAMOS QUE  AS BÁGOAS SE CONVERTAN EN SORRISOS   LUME DE QUENTURA E LUZ   Ao redor do lume, que nos ofrece luz e quentura, xuntámonos no nome do Señor para comezar a cel