DIÁLOGO ENTRE AS XERACIÓNS, EDUCACIÓN E TRABALLO INSTRUMENTOS PARA CONSTRUIR UNHA PAZ DURADEIRA
CANTOS: Panxoliñas
BENDICIÓN NO COMEZO
- Que Deus nos bendiga todos os días do ano,
- Que Deus nos sorría todos os días do ano,
- Que Deus se fixe en nós todos os días do ano,
- Que Deus nos conceda a súa paz todos os días do ano
- A paz, o amor e a xustiza de Deus, que se manifestaron en Cristo, nacido para a nosa salvación, sexan con todos e con todas vós.
OLLOS DE ESPERANZA
Por segundo ano consecutivo celebramos o Nadal mergullados nunha pandemia que non cesa. Camiñamos con desacougo, con medo, no medio da incertidume.Mais non podemos deixar que a tebra nos envolva. Hoxe comezamos un novo ano. Estamos hoxe aquí para agradecer este don de Deus e poñelo baixo a tenrura de María. Que ela, muller forte, crente e nai, nos axude ser pequenas lumieiras capaces de alumear a quen camiña ao noso carón.
CORAZÓN MISERICORDIOSO
Porque son demasiadas as ocasións nas que renunciamos ao diálogo, caendo na tiranía da imposición, SEÑOR, ÉNCHENOS COA TÚA PAZ.
Por renunciar a educarnos na cultura do coidado; CRISTO, ÉNCHENOS COA TÚA PAZ.
Por non ter descuberto o traballo como camiño de realización persoal, SEÑOR, ÉNCHENOS COA TÚA PAZ.
PALABRA PROCLAMADA
PROCLAMACION DA PALABRA RECOLLIDA NO LIBRO DOS NÚMEROS
O Señor faloulle a Moisés:- "Dilles a Aharón e a seus fillos: desta maneira habedes de bendicir os fillos de Israel: Que o Señor te bendiga e te garde. Que o Señor faga brillar sobre ti o seu rostro e se compadeza de ti. Que o Señor che mostre o seu rostro e che conceda a paz. Eles invocarán así o meu nome en favor dos fillos de Israel e eu bendicireinos".
PROCLAMACION DA PALABRA RECOLLIDA NA CARTA DE PAULO AOS GÁLATAS
Mais así que chegou a plenitude dos tempos, Deus mandounos o seu Fillo, nacido de muller e suxeito á Lei, para rescatar os que estabamos baixo a Lei e para que recibísemos a filiación.A proba de que sodes fillos del é que Deus mandou ós vosos corazóns o Espírito do seu Fillo que exclama ¡Abbá! (que quere dicir ¡meu Pai! ). Polo tanto, ti xa non es escravo, senón fillo. E, por seres fillo, tamén, grazas a Deus, es herdeiro.
PROCLAMACION DA BOA NOVA DO NOSO SEÑOR XESUCRISTO SEGUNDO LUCAS
Os pastores foron a correr e atoparon a María e mais a Xosé, e á criatura deitada na manxadoira. O que o viron, contaron todo o que lles dixeran do meniño, deixando pasmados a cantos escoitaban o que tal dicían os pastores.María, pola súa parte, conservaba todas estas cousas no seu corazón.
Os pastores volveron, glorificando e loando a Deus por canto viran e oíran, tal como lles fora anunciado.
Aos oito días tocaba circuncidar o neno e puxéronlle de nome Xesús, tal como o chamara o anxo antes da súa concepción.
PALABRA REMOÍDA
O Papa Francisco, na súa mensaxe da Xornada da Paz, fala de tres camiños para construír unha paz duradeira:
1. Diálogo entre as xeracións: Todo diálogo supón unha confianza entre as persoas interlocutoras, porque dialogar significa escoitarse, confrontarse, poñerse de acordo e camiñar xuntos. A crise sanitaria que sufrimos aumenta en nós a sensación de soidade e podemos caer na tentación de pecharnos en nós mesmos. A xente maior séntese soa, a mocidade séntese impotente, as crianzas teñen medo... É urxente, xa que logo, abrir camiños de diálogo: a mocidade precisa da experiencia da xente maior e a xente maior precisa do afecto e do dinamismo da mocidade. Non desaproveitemos esta oportunidade para construír xuntos camiños para a paz.
2. A educación: É a base dun desenvolvemento humano integral, pois fai á persoa máis libre e responsable ao tempo que é unha ferramenta indispensable para a defensa e a promoción da paz. Só investindo en educación teremos sociedades cohesionadas, capaces de xerar esperanza, riqueza e progreso. Unha educación capaz de poñer no centro á persoa e a ética do coidado. Se algo nos deixou claro a pandemia é que somos fráxiles, que precisamos unhas persoas doutras e que o coidado ten que ser a ponte capaz de unir ás persoas nun diálogo entre xeracións.
3. O traballo: A crise sanitaria leva parella unha crise económica. O traballo é, nestes momentos, un ben escaso. E, como ocorre sempre en momentos de crise, é unha oportunidade para que moita xente, buscando só o seu propio proveito e enriquecemento, non teña reparo ningún en explotar aos demais, esquecendo que o traballo ten que ser camiño de realización da persoa. Se cadra hoxe máis ca nunca debemos reclamar un traballo digno para todos os seres humanos, desenvolvido en condicións laborais decentes e dignas orientadas ao ben común e ao coidado da creación e un salario xusto, que permita unha vida digna persoal, familiar e social. O traballo, non debemos esquecelo, é un factor indispensable para construír e manter a paz, pois é a base sobre a que se constrúen a xustiza e a solidariedade.
Que Santa María, Raíña da Paz, nos dea folgos para camiñar por estes vieiros.
ORACIÓN COMPARTIDA
Neste día santo no que se nos deu un Salvador, dicimos:
QUE SEXAMOS PERSOAS CONSTRUTORAS DE PAZ
û Para que toda a Igrexa non peche nin os oídos nin o corazón ao clamor das persoas pobres da terra, que imploran xustiza e paz, OREMOS.
û Para que as nosas comunidades sexan sempre berces de diálogo entre as diferentes xeracións que nelas convivimos, OREMOS.
û Polas vítimas da pandemia e polas súas familias; por todas as persoas que nesta longa noite de pedra tratan de ser pequenas lumieiras de esperanza, OREMOS.
û Por cada unha e cada un de nós para que, sen facer balbordo, con humildade e perseveranza, nos convertamos cada día en persoas artesás da paz, OREMOS.
Grazas, Señor, por facerte un de nós para traernos a felicidade e a esperanza. P.X.N.S. Amén
MIRADA DE ESPERANZA
Non che desexo un ano marabilloso no que todo sexa bo. Este é un pensamento máxico, infantil, utópico.
Deséxoche que te animes a mirarte, e que te queiras como es.
Que teñas o suficiente amor propio para pelexar moitas batallas e a humildade para saber que hai batallas imposibles de gañar e polas que non paga a pena loitar.
Deséxoche que non te permitas os “non podo” e recoñezas os “non quero”.
Deséxoche que escoites a túa verdade e que a digas con conciencia plena de que só é a túa verdade, e non a da outra persoa.
Que te expoñas ao que temes, porque é o único xeito de vencer o medo.
Que aprendas a tolerar as “manchas negras” da outra persoa, porque cadaquén ten as súas.
Que non te condenes por equivocarte, non somos persoas todopoderosas.
Que medres ata onde e cando queiras.
Que logres ser feliz, sexa cal sexa a realidade que che toque vivir.
Comentarios