III DOMINGO DO T.O.
PERMANECEDE NA MIÑA PALABRA
(DOMINGO DA PALABRA DE DEUS)
CANTOS
· ENTRADA: Que ledos hoxe estamos (Nº 5)
· LECTURAS: A túa Palabra (Nº 25)
· OFERTORIO: Acharte presente (Nº 51)
· COMUÑÓN: Seguirei os teus pasos (Nº 103)
ABRE OS OLLOS
Hoxe é o terceiro domingo do tempo ordinario, e desde hai cinco anos, o papa Francisco quixo que este fose o domingo da Palabra de Deus. Non quere dicir que os demais non o sexan, non. O que busca o papa é que neste domingo prestemos especial atención, e valoremos a importancia que a Palabra ten na vida da persoa cristiá. Non é só Palabra proclamada na celebración, tamén é Palabra agradecida por atopar nela o marabilloso plan que Deus ten para con nós.ABRE O CORAZÓN
Porque somos moito de ritos e pouco de coñecer e valorar a Palabra coa que Deus se nos mostra; SEÑOR, QUE PERMANEZAMOS NA TÚA PALABRA.Porque non facemos da Palabra de Deus fonte de vida e camiño de esperanza; CRISTO, QUE PERMANEZAMOS NA TÚA PALABRA.
Porque non lle prestamos a atención que merece á Palabra proclamada nas celebracións; SEÑOR, QUE QUE PERMANEZAMOS NA TÚA PALABRA.
ABRE OS OÍDOS
PROCLAMACIÓN DA PALABRA RECOLLIDA NA PROFECÍA DE XONÁS
Naqueles días, veulle de segunda vez a palabra do Señor a Xonás:- Érguete, vai a Nínive, a gran cidade, e proclámalle a mensaxe que eu che dei.
Xonás ergueuse e marchou a Nínive, con forma á palabra do Señor. Nínive era una cidade enormemente grande, de tres días para atravesala.
Xonás comezou a entrar na cidade, percorrendo o camino dun día, e predicaba así:
- Dentro de corenta días, Nínive será destruída.
Os homes de Nínive creron en Deus e proclamaron o xaxún. Vestíronse de saco desde o máis grande ao máis pequeño.
Viu Deus as súas obras, como se convertían do seu mal camiño e arrepentiuse do mal que dixera que lles ía facer, e non llelo fixo.
PALABRA DO SEÑOR
PROCLAMACIÓN DA PALABRA RECOLLIDA NA PRIMEIRA CARTA DE PAULO APÓSTOLO AOS CORINTIOS
O que vos digo, irmáns, é que o tempo é contado. O que importa, é que os que teñen muller vivan coma se non a tivesen; os que choran, coma se non chorasen; os que están alegres coma se non se alegrasen; os que comercian, coma se non tivesen nada; os que gozan no mundo, coma se non gozasen. Porque o mundo, na súa configuración actual, está a pasar.PALABRA DO SEÑOR
PROCLAMACIÓN DA BOA NOVA DO NOSO SEÑOR XESUCRISTO SEGUNDO MARCOS
Cando prenderon a Xoán, marchou Xesús a Galilea a anunciar a Boa Nova de Deus, dicindo:- O tempo está cumprido, e chega o Reino de Deus; convertédevos, e crede na Boa Nova.
Camiñando pola ribeira do mar de Galilea, viu a Simón e mais a Andrés, seu irmán, largando o aparello no mar: eran pescadores. Díxolles Xesús:
- Vide comigo, e fareivos pescadores de homes.
E deixando de contado o aparello, seguírono. Un pouco máis adiante viu a Santiago, fillo de Zebedeo e mais a Xoán, seu irmán; estaban arranxando o aparello na barca. E de seguida os chamou. Eles, deixando a seu pai, Zebedeo, e mais os seus tripulantes na barca, seguírono.
PALABRA DO SEÑOR
PALABRA QUE ALENTA O CAMIÑO
Nínive era unha cidade rica e os seus habitantes tiñan de todo. Vivían no individualismo e na comodidade, sen preocupacións polo futuro. Pero... chegou a crise e perderon o norte. Sóanos o conto? Neste contexto, Xonás quere ser a voz que clama no deserto de Nínive chamando a endereitar o rumbo. Xonás dilles que recapaciten e que volvan de novo a Deus, onde está o sentido, a forza e a esperanza. Nós hoxe, no noso mundo rico e deshumanizado, tamén se cadra perdemos o norte do que é importante. Nós tamén precisamos converternos e cambiar actitudes, palabras e feitos da nosa vida, desbotando dela aquilo que nos fai persoas individualistas, duras, insensibles, cómodas e egoístas. Hoxe é un bo momento para comezar, non desaproveitemos esta oportunidade.
Esta é a conversión da que nos fala Xesús no Evanxeo. Unha conversión que ha ser real, verdadeira, auténtica. Non unha conversión de palabras ou para quedar ben. A conversión ten que partir do corazón. Só desde aí poderemos facer realidade a encomenda de Xesús cando nos di que temos que ser homes e mulleres capaces de pescar persoas. Porque só desde unha vida coherente e consecuente poderemos dar testemuño. Porque só desde a empatía e a capacidade de poñernos no lugar da outra persoa, sen imposicións, seremos quen de evanxelizar. Porque só desde a esperanza e a alegría seremos quen de ser persoas anunciadoras do Reino que Xesús nos trouxo: un Reino de xustiza, de paz, de fraternidade e de igualdade.
Iso é o que significa permanecer na Palabra de Deus: unha Palabra que alimenta, rega e reverdece o noso corazón para que poida dar froitos abondosos e sempre novos. Grazas, Señor, polo agasallo dunha Palabra de Vida e Verdade!
REZAMOS EN COMUNIDADE
Cando Xesús chama, faino para que sexamos felices. Poñamos entón a nosa vida nas súas mans, para que a alente e a acompañe, e digámoslle:GRAZAS POLA TÚA PALABRA DE VIDA, SEÑOR
- Para que a Igrexa camiñe tras as pegadas de Xesús, proclamando con ledicia o Evanxeo e atenta aos sinais dos tempos, OREMOS.
- Para que contemplemos a grande luz que brilla no medio de nós, aínda cando habitamos en terras escuras, OREMOS.
- Para que a túa Palabra sexa proclamada con fe, acollida con gratitude, vivida con intensidade e testemuñada con paixón, OREMOS.
- Por cada unha e cada un de nós, para que sen medo sexamos capaces de converternos, OREMOS.
PARA A REFLEXIÓN
A Palabra de Deus é para todas as persoas. O Evanxeo preséntanos a Xesús sempre en movemento, en camiño cara aos demais. En ningunha ocasión da súa vida pública dános a idea de que sexa un mestre estático, un doutor sentado nunha cátedra. Ao contrario, vémolo como itinerante, vémolo peregrino, percorrendo pobos e aldeas, atopando rostros e historias.E esta Palabra de Deus, que se dirixe a todas e a todos, chama á conversión. A proximidade de Dios non é neutra, a súa presenza non deixa as cousas como están, non preserva a vida tranquila. Ao contrario, a súa Palabra sacódenos, inquiétanos, aprémanos ao cambio. Transforma o noso corazón e a nosa mente; cámbianos, lévanos a orientar a nosa vida cara ao Señor.
Esta é a invitación de Xesús: Deus fíxose próximo a ti, así que toma conciencia da súa presenza, faille lugar á súa Palabra e cambiarás a perspectiva da túa vida. Quixese dicilo tamén deste xeito: pon a túa vida baixo a Palabra de Deus.
(Francisco)
Comentarios