Aninovo 2014

A FRATERNIDADE, FUNDAMENTO E CAMIÑO PARA A PAZ

Descarga o ficheiro
BENDICIÓN NO COMEZO

• Que Deus nos bendiga todos os días do ano,
• Que Deus nos sorría todos os días do ano,
• Que Deus se fixe en nós todos os días do ano,
• Que Deus nos conceda a súa paz todos os días do ano
• A paz, o amor e a xustiza de Deus, que se manifestaron en Cristo, nacido para a nosa salvación sexan con todos e con todas vós.

 
ESCOITA ACTIVA

Bos días e feliz ano novo para tod@s. Este mes de xaneiro (ianua, a porta) que hoxe comezamos fala de inicios. E sempre que empezamos algo, facémolo con moita ilusión, con bos propósitos e co desexo de poder rematalo. Por iso vimos aquí: para agradecerlle a Deus a súa compaña e para poñer estes doce meses que temos por diante na súa man. Si, porque a celebración de hoxe, na xornada da paz, é unha chamada a poñer todas as nosas ilusións e as nosas forzas en continuar, ao longo destes 365 días, o proxecto de Xesús: coidarnos e querernos coma irmáns e irmás. Que, como María, deixemos que esta Palabra, enchoupe o noso corazón. De certo, Deus ofrécenos, unha vez máis, un tempo cheíño de esperanza e posibilidades. Que faremos con el?.

 

CORAZÓN MISERICORDIOSO

• Porque se nos enche a boca falando de que queremos paz; pero non damos entendido que para que sexa posible debemos respectar e valorar aos demais tal e como son, SEÑOR, BENDÍCENOS COA TÚA PAZ.
• Porque a diferenza dos pastores non estamos dispost@s a deixar atrás rutinas, comodidades e indiferenzas para ir ao teu encontro, CRISTO, BENDÍCENOS COA TÚA PAZ.
• Porque a diferenza de María, non deixamos que a túa Palabra enchoupe o noso corazón, dándonos razóns para facer que non esmoreza a esperanza, SEÑOR, BENDÍCENOS COA TÚA PAZ.
  

PALABRA ENRAIZADA

• Deixamos atrás un ano no que, a ben seguro, houbo de todo: luces e sombras, bágoas e sorrisos, decepcións e tamén sorpresas agradables, cousas que foron ben e outras que non tan ben...Botando a vista cara atrás, unha cousa é certa: ter chegado ata aquí xa é un logro. Pero non chegamos solos: Deus foi compañeiro de camiño nas penas e nas alegrías, nas esperanzas e nas frustracións, nos momentos de debilidade e de fortaleza. El non se vai, sempre camiña ao noso carón, porque, como ben di a primeira lectura, bendícenos mostrándonos o seu rostro e dándonos a súa paz. E ese rostro de Deus estamos chamad@s a descubrilo en tanta e tanta xente que, no noso mundo, traballa arreo porque a esperanza e o desenvolvemento deixen de ser palabras bonitas e se convertan en actitudes reais para todas as persoas. Si, a bendición de Deus aléntanos para non deixarnos abater polas dificultades, móvenos para que non nos instalemos no derrotismo, deixando que sexan outros os que decidan por nós; espabílanos para que non caiamos na tentación do individualismo e do egoísmo e empecemos a pensar en comunidade; espértanos do soño do "sempre se fixo así" para invitarnos a romper prexuízos e esquemas preconcibidos e empezar a actuar desde o corazón e a misericordia; axúdanos a non deixarnos levar polo pesimismo e a que saquemos peito para encarar a vida con ilusión, valor e forza. Grazas, Señor, por bendicirnos cada día, cada minuto, cada segundo coa nosa familia, cos nosos amigos, con tantos sorrisos, con tantas mans tendidas, con tantos e tantos sinais que pos na nosa vida!!!!.
• E a bendición más grande é o seu Fillo. Que ben o entendeu Paulo e que ben llo transmite aos gálatas!. Certamente, esa historia de amor entre Deus e as persoas, á que adoitamos chamar historia de salvación, acada o seu cumio na persoa de Xesús, no que pasamos de escrav@s a fill@s e a herdeir@s. Cando botaremos fóra da nosa cabeciña esas entelequias que nos din que a relixión é sufrimento, dor, renuncia, pecado, condena, tebras..... agonía?, cando aprenderemos que Deus quere a nosa felicidade?, cando nos decataremos que a relixión ten que facer de nós mellores persoas e persoas felices?. Pode ser un bo compromiso para este ano que comezamos: revisar a nosa vida de fe para, como María, reflexionar e conservar todas estas cousas no noso corazón.
• A pouco que o fagamos, descubriremos o desexo da fraternidade, da comuñón coas outras persoas, que non son inimigos nin contrincantes, senón irmáns e irmás que temos que acoller e querer. A isto é ao que nos chama a xornada da paz que hoxe celebramos en toda a Igrexa baixo o lema: "A fraternidade, fundamento e camiño para a paz" e na que o papa Francisco destaca:
  • como fill@s dun mesmo Pai, a terra é a casa de todas as persoas
  • non debemos deixarnos levar pola "globalización da indiferenza", pechándonos en nós mesmos
  • somos seres feit@s para a reciprocidade, para a comuñón e o don
  • a fraternidade, é dicir, sentirnos irmáns e irmás de todas as persoas debe estar no centro da economía e da política
  • o servizo é a alma da fraternidade
  • a fraternidade, fundamento e o camiño para a paz, debe ser descuberta, experimentada, anunciada e testemuñada.
• Que esta nova páxina da nosa vida que estreamos nos axude a coñecer e recoñecer neste Neno que vén de nacer a aquel que acompaña o noso camiñar e que nos trae a paz. Os pastores deixaron todo atrás e foron adoralo. Nós, hoxe, tamén nos sentimos chamad@s por El e vimos aquí para acompañalo, para ofrecerlle o que somos e o que temos, para que El bendiga as nosas vidas e as daqueles que camiñan connosco.

 

FRATERNIDADE ORANTE

Na festa de Santa María, e neste comezo de ano que nos volve falar outra vez de paz, sentímonos fondamente achegados uns aos outros para dicirlle a Deus.

BENDITO O QUE VÉN NO NOME DO SEÑOR

• Por unha Igrexa viva, aberta, solidaria e pacífica, que saiba acoller e non fomente nunca o pensamento único e a obediencia cega, OREMOS.

BENDITO O QUE VÉN NO NOME DO SEÑOR

• Por unhas comunidades cristiás que, asentadas sobra a forza da paz e o camiño da fraternidade, saben ser testemuñas de encontro, perdón e tolerancia no medio dos enfrontamentos dunha sociedade que moitas veces se esquece de Deus, OREMOS.

BENDITO O QUE VÉN NO NOME DO SEÑOR

• Por nós, que hoxe queremos comezar este novo ano cheos de proxectos, ilusións e esperanzas, para que co paso dos días non nos deixemos levar da frustración, da desesperanza e do pesimismo, OREMOS.

BENDITO O QUE VÉN NO NOME DO SEÑOR

Grazas, Señor, porque sabemos que a fraternidade que Ti nos dás, é o fundamento e o camiño para a paz. Axúdanos a traballar arreo para non caer na indiferenza. P.X.N.S. Amén

MIRADA ESPERANZADA

Deus fíxose amor para quen ten o corazón roto e

só coñeceu orfandades e xenreiras.

Deus fíxose liberdade para quen está preso

e para os escravos, de si ou doutros.

Deus fíxose consolo para os que sofren, agardan

e choran á marxe dos camiños.

Deus fíxose xustiza para quen está marxinado

e ten fame e sede de vida.

Deus fíxose pan e viño para quen se baleirou

dándose sen reservas, enteiro, en vieiros e camiños.

Deus fíxose novidade para desmantelar o tenderete

de normas e leis que montamos para conseguir o seu beneplácito.

Deus fíxose un de nós para que nós non esquezamos agora,

neste momento, e logo,

que somos fill@s seus, e por iso, irmáns e irmás entre nós.

 

CANTO GOZOSO

• Panxoliñas