SANTA MARÍA, NAI DE DEUS
A FAMILIA HUMANA, COMUNIDADE DE PAZ
CANTOS
* Panxoliñas
BENDICIÓN AO COMEZO
¨ Que Deus nos bendiga todos os días do ano
¨ Que Deus nos sorría todos os días do ano
¨ Que Deus se fixe en nós todos os días do ano
¨ Que Deus nos conceda a súa paz todos os días do ano
OLLOS ABERTOS
Hoxe, que comezamos un novo ano, a Igrexa celebra a Xornada Mundial da Paz. No medio dunha humanidade envolta en tantas guerras e conflitos, a Igrexa, nós, queremos comezar o aninovo volvendo os nosos ollos cara ó Neno que vén de nacer e que nos trae a paz verdadeira. E elevamos cara ese Deus Neno unha oración pola paz para que toque os nosos corazóns e nos axude a botar fora deles os obstáculos que lle poñemos á xustiza e á paz; porque co corazón cheo de xenreira, de condena, de intolerancia ou dogmatismo nunca poderemos aportar paz á convivencia entre as persoas.
E facémolo desde a mellor das mediadoras: María, Raíña da Paz baixo cuxa protección poñemos este novo ano 2024 que hoxe comezamos.
CO CORAZÓN MAGOADO
* Porque falamos de paz en abstracto; pero non somos capaces de falarlle ou darlle a man a quen temos máis preto; SEÑOR, TI ES A NOSA PAZ.
* Porque estamos ben lonxe de sentir a terra coma a casa común que nos deches para que a habitemos con creatividade e responsabilidade, CRISTO, TI ES A NOSA PAZ.
* Porque non utilizamos unha linguaxe de paz na nosa vida cotiá, coas nosas familias, cos nosos compañeiros de traballo, cos nosos veciños e amigos, SEÑOR, TI ES A NOSA PAZ.
PALABRA PROCLAMADA
PROCLAMACION DA PALABRA RECOLLIDA NO LIBRO DOS NÚMEROS
O Señor faloulle a Moisés:
- "Dilles a Aharón e a seus fillos: desta maneira habedes de bendicir os fillos de Israel: Que o Señor te bendiga e te garde. Que o Señor faga brillar sobre ti o seu rostro e se compadeza de ti. Que o Señor che mostre o seu rostro e che conceda a paz. Eles invocarán así o meu nome en favor dos fillos de Israel e eu bendicireinos".
Palabra do Señor
PROCLAMACION DA PALABRA RECOLLIDA NA CARTA DE PAULO AOS GÁLATAS
Mais así que chegou a plenitude dos tempos, Deus mandounos o seu Fillo, nacido de muller e suxeito á Lei, para rescatar os que estabamos baixo a Lei e para que recibísemos a filiación.
A proba de que sodes fillos del é que Deus mandou ós vosos corazóns o Espírito do seu Fillo que exclama ¡Abbá! (que quere dicir ¡meu Pai! ). Polo tanto, ti xa non es escravo, senón fillo. E, por seres fillo, tamén, grazas a Deus, es herdeiro.
Palabra do Señor
PROCLAMACION DA BOA NOVA DO NOSO SEÑOR XESUCRISTO SEGUNDO LUCAS
Os pastores foron a correr e atoparon a María e mais a Xosé, e á criatura deitada na manxadoira. O que o viron, contaron todo o que lles dixeran do meniño, deixando pasmados a cantos escoitaban o que tal dicían os pastores.
María, pola súa parte, conservaba todas estas cousas no seu corazón.
Os pastores volveron, glorificando e loando a Deus por canto viran e oíran, tal como lles fora anunciado.
Aos oito días tocaba circuncidar o neno e puxéronlle de nome Xesús, tal como o chamara o anxo antes da súa concepción.
Palabra do Señor Grazas a Deus
PALABRA REMOÍDA
Ao comezar o ano, comprometémonos a traballar pola paz en tres ámbitos ou aspectos:
* PAZ INDIVIDUAL
ü Paz para cada un e cada unha de nós, porque non somos persoas pacíficas nin pacificadoras, senón que sentimos odios e violencia. Se non temos paz interior non poderemos transmitila. Non nos aceptamos a nós mesmos, andamos frustrados, acomplexados, desacougados… Temos violencia e agresividade en cantidades industriais; deseguida se nos escapa a palabra ferinte, o xesto contrariado, o ton elevado, o insulto fácil… Por iso, o primeiro banzo sería o de aceptarnos e querernos humilde e sinxelamente, e sentirnos queridas e queridos por Deus.
* PAZ NA SOCIEDADE
ü Gaza, Ucraína, Sudán... O mundo está en guerra. Somos conscientes da cantidade de muros de todo tipo que hai que derrubar para que a paz progrese no mundo: muros económicos, políticos, raciais, culturais, muros de incomprensión, de insolidariedade, de inxustiza, de egoísmo… Se pousamos os nosos ollos na sociedade na que vivimos, decatarémonos de que falla paz, de que falla amor, de que falla humanidade. O ton de vida é agreo e resentido. E nós…. facemos algo para que isto mude ou aínda contribuímos a quentar máis o ambiente?.
* PAZ EN TODA A CREACIÓN
ü Pero non basta con estar en paz coas persoas, senón que tamén debemos estar en paz coa natureza; pois a paz está ameazada tamén pola nosa falta de respecto cara á terra, pola explotación desordenada dos seus recursos, polo deterioro da calidade de vida. O cambio climático está aí... ou aínda o seguimos negando? O arco da vella da paz debe abranguer tamén á creación enteira, pois debemos ter claro que a destrución ou o abuso desconsiderado da natureza constitúe un problema de índole moral. Non somos os donos, senón os coidadores do mundo, non só non debemos destruílo nin contaminalo, senón que temos que traballar por deixalo máis limpo e habitable.
Paz con nós mesmos, paz cos demais, paz coa creación… Velaí o reto que Deus pon diante dos nosos ollos neste primeiro día do ano. Seremos quen de facelo noso?.
ORACIÓN DA COMUNIDADE
Na festa de Santa María, e neste comezo de ano que nos volve falar outra vez de paz, sentímonos fondamente achegados uns aos outros para dicirlle a Deus
BENDÍCENOS COA TÚA PAZ
- Pola paz do mundo, para que o Espírito mova os corazóns de todas as persoas cara á reconciliación, a tolerancia, a igualdade, o respecto e a xustiza, que ten como froito a paz, OREMOS. BENDÍCENOS COA TÚA PAZ
- Polas persoas que teñen responsabilidades en calquera ámbito, para que traballen sempre polo ben común, froito da xustiza, OREMOS. BENDÍCENOS COA TÚA PAZ
- Por unha Igrexa viva, aberta, solidaria e pacífica, que saiba acoller e que non fomente nunca o pensamento único e a obediencia cega. OREMOS. BENDÍCENOS COA TÚA PAZ
- Por unhas comunidades cristiás que, asentadas sobra a forza da paz e o camiño da non violencia, saben ser testemuñas de encontro, perdón e tolerancia no medio dos enfrontamentos dunha sociedade que moitas veces se esquece de Deus. OREMOS. BENDÍCENOS COA TÚA PAZ
· Por nós, que hoxe queremos comezar este novo ano cheos de proxectos, ilusións e esperanzas, para que co paso dos días non nos deixemos levar da frustracións da desesperanza e da incapacidade da non consecución das metas trazadas. OREMOS. BENDÍCENOS COA TÚA PAZ
Señor, escoita as oracións que che vimos de presentar e todas aquelas que levamos dentro do noso corazón. Bendice as nosas vidas, e as daqueles que queremos ao longo deste ano que hoxe comezamos. Pedímoscho por Xesucristo, noso Señor. Amén.
MIRADA ESPERANZADA
Deséxoche, no comezo dun novo ano:
Que Deus te mire e te envolva.
Que Deus alegre o teu corazón.
Que te encha de paz e de alegría.
Que che dea sabedoría para entender a vida como entrega.
Que che dea novidade para facer de cada día algo novo, non unha triste rutina.
Que te encha de forza nos días grises e de cansazo.
Que che dea tanto amor que non midas a entrega.
Que che conceda delicadeza para facer do amor «detalles de amor».
Que che dea sensibilidade para ler os murmurios secretos do corazón.
Que sexa o teu horizonte e a túa fonte.
Deséxoche:
Que Deus Pai e Nai, recree cada día a túa vida.
Que Deus Fillo, sande e cure as feridas que te encerran en ti mesmo.
Que Deus Espírito Santo, avive en ti todo o que Xesús nos dixo e nos deixou como signo de Vida Nova.
Deséxoche:
Que todos estes desexos poidan ser unha realidade na vida de cada día.
Comentarios